Isko iluzionon Realin, Siti përmbysje madhështore
De Bryjne magjik, në “Etihad” duhet mrekulli pa Ramosin
Ishte në ajër prej kohësh dhe shumë ishin gati të vinin bast për suksesin e Sitit në Madrid: “Pas skualifikimit nga UEFA janë më të karkikuar”, dhe kishin të drejtë. Anglezët mundin 2-1 për herë të parë Realin dhe hedhin një hap të rëndësishëm drejt çerekfinaleve të Champions-it. Guardiola mposht Zidanin: i habit të gjithë me lënien jashtë të Agueros dhe zgjedh modulin 4-2-4, godet me ndërrimin e Sterlingut në vend të Bernardos në momentin vendimtar të ndeshjes dhe menaxhon më së miri tensionin e një stadiumi dhe qyteti që e urren. Bilanci i tij kundër Realit bëhet më solid: 10 fitore, 4 barazime dhe 4 humbje. Kapiteni i Sitit në këtë përmbysje historike është De Bryjne: më i miri në fushë me një asist dhe gol.
BENZEMA – Siti prezantohet agresiv, Reali është më i kujdesshëm. Surpriza vjen nga statistikat e fundit të pjesës së parë: 53% zotërimi i topit nga spanjollët. Kampionët e Anglisë sulmojnë për linjat vertikale, por duhet pritur minuta e 21-të për të parë asistin e De Bryjnes: goditja e Zhezus ndalet nga Kurtua. Mahrez shkel në të gjithë fushën, problemi është se është gati ta marrë topin edhe në dhomën e zhveshjes: në 25’ rrezikon shumë në mbrojtje. Krosimi i Mendisë në 30’ është perfekt, shkëputja e Benzemasë me kokë fantastike, por Ederson bën kryevepër me dorën e djathtë. Në 33’ ndërrimi i parë: Laport dëmtohet, hyn Fernandinjo. Rast fantastik për Sitin për të shkuar në pushim në avantazh: Zhezus godet, por Kasemiro shpëton mbi vijën fatale.
ISKO – Rinis ndeshja dhe ka një ritëm tjetër. De Bryjne arratiset në kundërsulm në 50’ dhe shërben Mahrezin, goditjes së algjerianit i mungon saktësia. Ai provon sërish, por Kurtua është i kujdesshëm. Kthesa vjen pas një ore lojë: gabim në kundërsulm i Sitit, Vinicius rrëmben topin, Uoker dhe Fernandinjo gabojnë dhe Isko ka gjithë kohën e mundshme për ta dërguar topin në rrjetë. Guardiola duartroket skuadrën e tij, por në 72’ Ramosit i shmanget festa nga devijimi i Fernandinjos.
PËRMBYSJA – Në 5 minuta gjithçka përmbyset. Hyn Sterling, del Bernardo dhe Siti në 78’ barazon: numër i De Bryjnes, krosim për Zhezus dhe braziliani me kokë
mposht Kurtuanë. Reali proteston për një shtyrje ndaj Ramosit, por për VAR-in është gjithçka e rregullt. Në 83’ Sterling pengohet në zonë nga Karvahal dhe Orsato nuk ka dyshime. Moviola nuk ndërhyn dhe De Bryjne hedh nga krahu tjetër
Kurtuanë. Goditje fatale për vendësit që në 86’ humbasin edhe Ramosin për faullin ndaj Zhezusit të nisur drejt porte. Një mungesë që e shton vështirësinë e misionit të rekordmenëve të Europës për të bërë mrekullinë në “Etihad” më 17 mars.