Pep: Nëse ka një ekip që e përmbys, është Reali
“I studiova 10 ditë dhe i analizova me futbollistët”
Pep Guardiola u bë trajneri me më shumë fitore në fazën me eliminim direkt në Champions (28), duke parakaluar Ançelotin, Murinjon dhe Fergusonin. Por mjeshtri katalanas, pasi vlerëson prezencën e skuadrës së tij në një stadium si “Bernabeu”, thotë se asgjë nuk ka mbaruar. “Ne u përpoqëm që të vinim këtu dhe ta fitonim ndeshjen. Dhe ia dolëm. Por kjo është vetëm pjesa e parë. Nëse ka një klub që mund ta përmbysë këtë situatë, ai është Reali. Pësuam një gol kur ishim në momentin tonë më të mirë. Kur ata ishin më mirë, ne shënuam. I tillë është futbolli. Më kujtohet çerekfinalja e disa sezoneve më të parë në ‘Anfield’ kur luanim jashtëzakonisht mirë dhe Liverpuli shënoi me të gjitha goditjet në kuadrat”, tha tekniku i Mançester Sitit, i cili komentoi edhe dëmtimin e Laport: “Pas 5 muajve i dëmtuar, në një skenar si ky është një ndeshje shumë kërkuese. Fernandinjo e zëvendësoi shumë mirë. Jam shumë krenar. Ky është vetëm hapi i parë, nuk ka mbaruar. Ne mund ta shijojmë momentin. Të dielën
kemi një finale (Kupa e Ligës). Do të vazhdojmë rrugën tonë në Premier Ligë dhe përgatitemi për ndeshjen e kthimit kundër Realit”. Penalltitë janë kthyer në një makth për “Qytetarët” këtë sezon, por Kevin De Bryjne e mori këtë përgjegjësi dhe e ekzekutoi me gjakftohtësinë e një kapiteni: “Kevin i ka praktikuar penalltitë dhe tregoi personalitet dhe përkushtim. Dhe unë i
them ‘faleminderit’, jo vetëm Kevinit, por të gjithë atyre që kanë ekzekutuar këtë sezon, ata që kanë shënuar dhe jo. Duhet guxim. Kurtua ishte fantastik. Jemi të avantazhuar, sepse shënuam dy gola në transfertë. Pushuam për 10 ditë dhe unë pashë të gjitha ndeshjet e Realit dhe u dhashë shumë informacione lojtarëve të mi. Valverden nuk e njihja deri këtë sezon”.