Rumenige: Çek të bardhë Flikut për rinovimin

Pas fitores 3-0 ndaj Çelsit në ndeshjen e parë për 1/8-at e Champions-it, bosi i bavarezëve, Karl Hainc Rumenige, ishte shumë i lumtur duke komplimentuar skuadrën e tij. Në fjalën e tij gjatë banketit të zakonshëm që zhvillon klubi gjerman pas netëve të tilla, Rumenige tha se: "Dua të shpreh përgëzimet e mia më të siqnerta për skuadrën, trajnerin dhe stafin, për performancën e treguar në fushën e lojës. Nuk është e lehtë të fitosh në një fushë të tillë dhe ndaj një kundërshtari si Çelsi", tha Karl. Më pas, ai iu drejtua trajnerit Hansi Flik duke i thënë se: "Pa dyshim që Hansi ka një meritë të veçantë për mënyrën se si e përgatiti këtë ndeshje. Të gjithë e dimë që nuk është e lehtë në një moment të tillë. Nëse do të ishte për mua, do t'ia dorëzoja që sot (të martën) stilolapsin për të firmosur rinovimin. Por kjo ka kohë dhe mendoj se do të ndodhë shumë shpejt. Shpresoj që ai të vazhdojë kështu, jemi shumë të kënaqur me të. E ardhmja po flet pa dyshim në favorin e tij". Për Rumenigen tani vjen pjesa më e vështirë e sezonit. "Ky rezultat na jep mundësinë për të qëndruar të qetë, të paktën për disa javë. Në Mynih duhet të luajmë sikur të ishim 0-0, nuk besoj se skuadra mendon se është kualifikuar. Sigurisht 3-0 është një rezultat i mirë, por në futboll mund të ndodhë gjithçka. Tani kërkoj nga ju një përqëndrim maksimal për ndeshjen e radhës në kampionat. Lufta për titull është bërë interesante por ne jemi Bajerni dhe titulli kalon gjithmonë nga ne", tha i entuziazmuar Karl Hainc Rumenige në banketin pas ndeshjes me Çelsin.