Donaruma, Milani pret “çekun” 50 mln eurosh

21-vjeçari me shumë admirues, Juvja, Real e PSG në garë

Edhe e djeshmja ka qenë një ditë pa stër vitje për Xhanluixhi Donarumën. Pas ndrydhjes në kavilje të pësuar kundër Fiorentinës, portieri nuk po arrin të riaftësohet dhe me gjasë nuk do të jetë në fushë të dielën në 12:30 ndaj Xhenoas në “San Siro”. Në këto kushte bëhet gati për debutimin si titullar gardiani rezervë Asmir Begoviç, i cili debutoi pikërisht një javë më parë në Firence me dy pritje të mrekullueshme duke dhënë garanci për rolin e zëvendësit. 32-vjeçari është gati, por mjekët kuqezinj do të mundohen deri në minutat e fundit të riaftësojnë Xhixhon jo vetëm për cilësitë e 21vjeçarit, por edhe për sigurinë që u transmeton shokëve të repartit të tërhequr.

LARGIMI - Teksa Xhixho lufton më kohën për t’u riaftësuar, në llogarinë të tij kanë rilindur zërat për largimin nga Milani në fund të sezonit. 21-vjeçarit i skadon kontrata pas një viti dhe te Milani ende nuk e kanë marrë nën shqyrtimin rinovimin e tij megjithëse është nga çështje më të rëndësishme e që duhet zgjidhur sa më shpejt. Duke e nisur sezonin e ardhshëm më portierin në skadencë, kuqezinjtë rrezikojnë të humbasin pa fituar asgjë pas një viti, ndaj Donaruma në verën e 2020-ës do të rinovojë ose do të shitet. Klubi dëshiron të përfitojë të paktën 50 milionë euro për kartonin e portierit të rritur në akademinë kuqezi, ndaj nëse sakrifica do të ndodhë, do të duhet që t’ia vlejë.

PRETENDENTË – Shifra e pretenduar për Xhixhon nuk tremb asnjë nga klubet e mëdha. Juventusi përflitet prej kohësh si destinacioni i radhës i 21-vjeçarit e dje përmendej një shkëmbim kokë më kokë me Federiko Bernardeskin, një mundësi që nuk gjen shumë konfirmime te Milani. PSG gjithashtu është një nga klubet që e ka pasur numrin 99 kuqezi në krye të listës gjatë viteve te fundit e këtë verë mund të jetë momenti i duhur për të tentuar goditjen. Në radhë edhe Reali i Madridit ku Tibo Kurtua nuk i ka lënë të gjithë të kënaqur. Raiola do të ketë detyrë të sigurojë ofertën më të mirë për “Djallin” dhe Xhixhon që nga ana e tij pretendon një ofertë rreth 10 milionë eurove në vit.