Silvester Shkalla: Ja pse zgjodha Bylisin

Silvester Shkalla është i sigurt se fitorja e parë për 2020ën do të vijë ndaj Flamurtarit. Mbrojtësi arkivon pikët e lëna rrugës gjatë këtyre javëve dhe paralajmëron kthesën e madhe. Në një prononcim të dhënë për "Panorama Sport", shtatlarti tregon edhe prapaskenën. Ai zbulon se mund të ishte transferuar që në verë në Ballsh, ndonëse lëvizja u konkretizua vetëm në janar. "Jam i lumtur që po luaj dhe që skuadra është në rrugë të mbarë duke iu rikthyer rezultateve pozitive. Mund të kishim qenë edhe më mirë, por duke parë kalendarin, mendoj se në lojë kemi kapur ritmin. Tashmë jemi të përqendruar te sfida e radhës me Flamurtarin në kampionat, por edhe te Kupa e Shqipërisë", thotë fillimisht 24-vjeçari. Më tej, ai tregon pse zgjodhi Bylisin: "Më ka pëlqyer si skuadër, e kam pasur kundërshtar edhe në Kategorinë e Parë. Realisht erdha që të luaj, ndonëse shoh se edhe këtu ka konkurrencë. Në Ballsh punohet mirë, ka disiplinë, rregull, ndërsa klubi ka ambicie. Besoj se kam bërë zgjedhjen e duhur tashmë që jam në kulmin e karrierës. Është një fillim i mbarë për mua dhe shpresoj që të vazhdoj me këtë ritëm. Madje, po zbuloj se në Ballsh mund të kisha ardhur që në verën e shkuar sepse kam pasur negociata. Lojtarët me perspektivë që duan të bëhen futbollistë, këtu i kanë të gjitha kushtet optimale. Për arsyet që përmenda më sipër, për anën financiare të garantuar, apo dhe për punën e mirë që bëhet unë dua Europën. Do ta synojmë nëpërmjet kampionatit dhe Kupës së Shqipërisë", përfundoi Shkalla.