“Në Itali do na i jepnin penallti”, autogoli i frikshëm i Mauricio Sarrit
Gaboi rëndë në artikulim, moviolisti Çezari e mbështet për rastin e Dibalës
Çdo herë që trajneri i "veçantë" i Juventusit hap gojë, bota bardhezi tronditet. Madje, dukej sikur Mauricio Sarri e kishte vendosur që nga fundjavë e ndeshjes me SPAL-in e deri në atë të duelit për titullin kundër Interit, kërkonte që ta përqendronte të gjithë rreth figurës së tij. Nëse në post-sfidën me SPAL-in e nisi me frazën se "nëse do na akordohej ne një penallti me radio policie, nëse VAR-i nuk punonte, bota do të ishte përmbysur". Ndërkohë, reagimet e tij vazhduan lidhur me protestën e idesë së JuventusInter mund të luhet me dyer të mbyllura. "Nëse na i mbyllin ne dyert e stadiumit, atëherë duhet t'ia mbyllin të gjitha skuadrave. Mjaft më na bënë shembull". Por ndoshta një frazë që nuk duhej të kishte dalë kurrsesi nga goja e tij, duhej të ishte ajo pas sfidës me Lionin. Lidhur me dy momentet e "inkriminuara" kundrejt Ronaldos dhe Dibalës, ku bardhezinjtë pretenduan për penallti ndaj Lionit, 61-vjeçari turfulloi: "Në Itali, ato dy momente do të kishin qenë penallti". Pavarësisht faktit se të dyja episodet ishin të dyshimta, ndonëse ai ndaj Dibalës duket më shumë penallti sesa ndaj Ronaldos, ndoshta Sarri vërtet donte që të shpjegonte metrin e ndryshëm të vlerësimit që ekziston mes Ligës së Kampioneve dhe Serisë A. Por mënyra sesi e artikuloi frazën e tij, u duk sikur donte të thoshte se në Itali Juventusi ndihmohet nga arbitrat. Nuk donte ta thoshte, por e tha ama... Dhe diçka e tillë është shumë e rëndë, një autogol vërtet i gabuar nga ana e trajnerit, i cili sikur të mos mjaftonte që bardhezinjtë paragjykohen prej shumë vitesh, madje prej dekadash, me deklaratën e tij Mauricio shtoi edhe më tepër dëshirën e kundërshtarëve për ta theksuar edhe më shpesh në vazhdim idenë se Juventusi
favorizohet, pasi këto fjalë deshën apo jo, dolën nga vetë buzët e teknikut të "Zonjës së Vjetër".
Moviola e Çezarit - Por për ta zbutur ndoshta disi daljen e gabuar të Mauricio Sarrit mendon moviolisti i rrjetit "Mediaset", ish-arbitri Graciano Çezari, i cili i jep të drejtë trajnerit të Juves për rastin e
Dibalës. "Për sa i përket rastit të minutës së 83-të, kur Denajer mbështet me dy duar për një fragment sekonde në shpinën e Ronaldos, unë mendoj se nuk ka një kontakt intensiv dhe arbitri Manzano ishte i pozicionuar shumë mirë. Duke pasur një imazh të qartë, edhe VAR-i me të drejtë nuk ndërhyri. Dhe jam dakord s'e nuk kishte ekstreme për penallti. Ndërsa në minutën e 89-të, këtu ndryshon situata. Pas pasimit me kokë të Ronaldos, Dibala mundohet që të mbajë nën kontroll sferën, e ka atë përpara vetes, ndërsa Guimaraesh, jo vetëm që i lidhet te bluza Dibalës, por në të njëjtën kohë e tërheq edhe drejt vetes sulmuesin e Juves, për ta larguar sa më shumë nga topi që Paulo provonte të godiste, derisa argjentinasi e lëshoi veten në tokë. Për mua, këtu kemi të bëjmë me penallti, sepse lojtari i Lionit nuk lejon që dinamika e lëvizjes së Dibalës të jetë normale. Në këtë rast, edhe pse Manzano e vlerësoi kështu, VAR-i duhej të ndërhynte, duke qenë se nga kamerat anësore dukej më qartë markimi me faull ndaj Dibalës", analizoi Çezari.