Van Basten: Ibra më provokoi, Saki nuk ishte njeri i ndershëm

Holandezi zbulon raportet me ish-trajnerin dhe suedezin

Në numrin e sotshëm të së përditshmes “Corriere della Sera” do të ketë një intervistë ekskluzive të Marko Van Bastenit. Në ekstraktin e fjalës së holandezit të publikuar dje, disa nga deklaratat nuk kaluan pa u ndierë. Më e forta ishte ajo për Arrigo Sakin, për të cilin “Mjellma e Utrehtit” nuk ushqen një simpati të jashtëzakonshme. “Mes nesh nuk ka pasur kurrë simpati. Personalisht nuk më ka dhënë kurrë ndjesinë se ishte i ndershëm në raportet njerëzore. Kur nuk ishte i kënaqur me mënyrën se si stërviteshim apo se si punonim, Arrigo u

hakërrehej të rinjve e atyre që ishin më të dobët, por që në atë moment po vraponin në krye të grupit”, pranon 55-vjeçari. Pas gjashtë vitesh tek Ajaksi, Van Basten zbarkoi në Itali në verën e vitit 1987. Do t’i mjaftonin pak muaj për të treguar se sa vlente. Lidhur me 8 sezonet si lojtari i

Milanit e 125 golat me fanellën kuqezi, ish-bomberi holandez deklaroi: “Në Milano ndihesha si në shtëpi. Kam jetuar një jetë atje, sepse aty linda si lojtar e si burrë. Te Milani u rrita e për fat të keq tifozët aty panë edhe fundin tim. Asokohe isha i bindur se asgjë nuk mund të më

ndalte e se do të arrija të luaja deri në moshën 38-vjeçare. Kur u dëmtova në fillim nuk e kuptoja se çfarë po ndodhte, madje shumicën e kohës isha i përqendruar tek e keqja ime. E kam pyetur veten qindra herë mbi arsyen se përse duhet të vuaja aq shumë, por nuk mora kurrë një përgjigje”. Në kujtimet e Van Basten ka edhe diçka të lidhur me një tjetër idhull kuqezi si Zlatan Ibrahimoviç. Teksa foli për suedezin, ai tregoi një episod lidhur me takimin e parë mes tyre. “Unë u ktheva tek Ajaksi si trajner dhe një djalë i ri më provokoi. ‘Ju jeni Van Basten, merrni topin dhe më tregoni çfarë dini të bëni’, më tha ai. Por, unë nuk mund të lëvizja më kyçin e këmbës. Kush ishte ai? E njohin të gjithë, emrin e ka Zlatan dhe mbiemrin Ibrahimoviç”, përfundoi Markon Van Basten.