Interi feston pa “zë”, Konte: Juvja, testi real
Bullgarët krijojnë iluzionin, përmbysen me Biragin e Lukakun
Gjashtë minuta frikë, më pas gjithçka në dishezë. Interi kalon Ludogoretsin dhe pret biletën e 1/8-ave të Ligës së Europës (shorti sot në Nion, në 13:00) pa u djersitur shumë, siç shpresonte gjithë bota zikaltër përpara sfidës për titull, të dielën, kundër Juves. Pozitiv goli i parë si zikaltër i Biragit dhe prova e Sançezit: forma rritet, po ashtu si dëshira dhe cilësia. Dhe asisti për Lukakun është dëshmi.
FRIKË DHE ÇLIRIM - Në një “San Siro” të zbrazur, për shkak të “emergjencës koronavirus” që bindi autoritetet e UEFA-s të mos hapin dyert e impiantit për publikun, në mënyrë që të minimizonin rreziqet e infektimit. Të sigurt nga rezultati i vajtjes (0-2 në transfertën e Razgrad), skuadra e Kontes është me një këmbë në 1/8-a dhe shkojnë të parët pranë golit në kundërsulm me Lukakun që i drejtohet i vetëm portës së Iliev, por belgu nuk arrin të realizojë. Pak më vonë përpiqet Aleksis Sançez me një diagonale që nuk gjen kuadratin. Eriksen shënjestron kuadratin nga goditja e dënimit. Duhet VAR-i që të shfajësojë Diakovin pasi lojtarët zikaltër kërkonin penalltinë për një prekje me dorë. Në momentin e kontrollit maksimal të Interit, bullgarët zhbllokojnë rezultatin falë Kulisë, që “injoron” Godinin dhe mposht Padelin. Dukej si një “dush i ftohtë” për vendasit, por reagimi nuk vonon: është Biragi që me një diagonale të bukur barazon gjithçka dhe rikthen qetësinë mes interistëve. Përpara pushimit, lojtarët e Kontes rikthehen të sulmojnë me Barelën që detyron Ilievin të grushtojë topin në goditje dënimi pas tentativës së italianit nga distanca. Në shtesë (plot 4 minuta për shkak të ndërprerjeve nga VAR-i), Lukaku e përmbys dhe hipotekon në mënyrë virtuale kalimin e turnit.
MENAXHIM - Me rikthimin në fushë, Konte heq nga fusha Barelën që ishte i paralajmëruar dhe në rast kartoni të verdhë do të mungonte në 1/8-at dhe në vendin e tij hyn Brozoviç për një mesfushë me më shumë cilësi, mbi të gjitha në planin e pasimeve: numri 77 kroat, pra, nuk kursehet kështu në prag të sfidës për titull kundër Juventusit. Luhet në një qetësi shurdhuese, dëgjohen vetëm zërat e protagonistëve në fushë, përfshi udhëzimet e dy trajnerëve. Në të 52-tën, zikaltrit i shkojnë një hap larg trisit me Aleksis Sançezin: traversë e plotë për kilianin, që dëshpërohet për rastin e pastër të shpërdoruar. Në
të 59-tën, është Lukaku që mund të kishte arkivuar praktikën bullgare, por tentativa e tij devijohet në shtyllë nga Iliev, që mban gjallë të tijtë. Ndërkohë, Konte mendon edhe për kampionatin dhe Lukaku i lë vendin Espozitos. Në momentet finale nuk ndodh praktikisht asgjë, me bullgarët të dorëzuar ndaj eliminimit. 5 minuta nga përfundimi i kohës së rregullt, Tçibota mund të kishte shënuar, megjithëse rrjeta do të kishte vlejtur në çdo rast vetëm për statistikë. Tani zikaltrit mund të mendojnë vetëm për Juventusin.