“Zgjohet” ministria: FSHF, jemi gati për planin e hapjes
Grupi i ekspertëve do të kryesohet nga një italian
Shqipëria po zbaton planin e hapjes për lehtësimin e masave shtrënguese ndaj përhapjes së Koronavirusit. E gjendur përballë faktit që sporti u mënjanua dhe u la në harresë nga instancat shtetërore, FSHF dërgoi letër dhe propozoi një protokoll masash për të mundësuar nisjen e aktiviteteve sportive dhe futbollit. Dje, Ministria e Shëndetësisë ka dhënë më në fund një përgjigje zyrtare, duke i hapur kështu rrugën bashkëpunimit mes institucioneve për planin e rifillimit të aktiviteteve sportive. "Panorama Sport" ka zbardhur dy letrat, fillimisht atë të ministrisë e më pas reagimin e FSHF-së.
MINISTRIA
"I nderuar z. Shulku. Në përgjigje të shkresës suaj, me nr.prot.373 datë 22.04.2020, nëpërmjet të cilës na përcillni propozimin për fillimin e aktiviteteve sportive, ju informojmë si vijon: Ministria e Shëndetësisë dhe Mbrojtjes Sociale, referuar vendimeve të Komitetit të Përkohshëm të Ekspertëve, për infeksionin e përhapur nga Koronavirusi i ri, ka hartuar strategjinë e rihapjes graduale të aktiviteteve/veprimtarive. Në këtë dokument, një vëmendje e veçantë u është kushtuar edhe aktiviteteve sportive për të cilat po punohen protokolle të posaçme të distancimit social dhe masave higjieno-sanitare. Në këtë kuadër do të vlerësonim bashkëpunimin tuaj për vijimin e hartimit të protokolleve të posaçme nëpërmjet krijimit të një grupi të përbashkët pune. Jeni të lutur të dërgoni përfaqësinë tuaj për të finalizuar hartimin e këtyre protokolleve", citohet përgjigjja e kthyer nga ministria për FSHF-në.
FEDERATA
Brenda ditës së djeshme, FSHF përmes sekretarit të përgjithshëm, Ilir Shulku, i ka kthyer përgjigje ministrisë për grupin e përbashkët të punës. Në shkresën e dërguar janë tre emra, që kryesohen nga italiani Xhanluka Stesina, i cili është përgjegjës i departamentit mjekësor të Kombëtares dhe njëkohësisht pjesë e "J-Medical" (qendra shëndetësore e Juventusit). FSHF përfaqësohet gjithashtu nga mjeku i Kukësit, Mel Ostreni, si dhe imazheristja Ariana Sinaj. "Sekretari i përgjithshëm, Shulku, do të jetë gjithashtu prezent në këtë grup pune për të garantuar disponibilitetin e FSHF-së në mbarë vendin. Duke shprehur edhe një herë gatishmërinë, jemi në pritje të koordinimit të takimit në kohën më të parë të mundshëm", citohej në reagimin e FSHF-së pas përgjigjes së ministrisë.