Taipi kundër karantinës: Më mirë të mos kthehem, pasi humb sezonin

Mesfushori: Në Zvicër stërvitem, por shokët e mi po vuajnë

Ende nuk mund të flitet për një datë konkrete për rifillimin e kampionatit, e megjithatë ekipe të ndryshme kanë filluar përgatitjet. Në Korçë ndihen të penalizuar nga ky fakt, ndaj po presin me ankth që t'i japin një zgjidhje kësaj çështjeje. Sikur të mos mjaftonte kjo pjesë, shqetësim më vete është riatdhesimi i lojtarëve. Mes tyre është edhe Shqiprim Taipi, i cili po pret me kureshtje lajme nga Shqipëria. Ai gjendet në Zvicër aktualisht dhe po pret me padurim OK-in që të marrë avionin dhe të nisë stërvitjen me ekipin. Për "Panorama Sport", tregon se rifillimi i sezonit do të ishte pozitiv për të gjithë aktorët e futbollit në vend, që prej afro dy muajsh janë duke vuajtur shkëputjen e kampionatit. "Shkëputja gjithmonë mbetet e vështirë për ne që jemi mësuar të jemi gjithnjë në aktivitet. E them këtë pasi vështirësitë me të cilat përballemi janë të shumta.

Që nga ndërprerja e kampionatit, që fillimisht u mor si masë paraprake tani kanë kaluar gati dy muaj dhe forma fizike është larguar komplet. Pavarësisht se kemi pasur mundësi të bëjmë stërvitje individuale, është shumë e vështirë. Ne kishim arritur një formë të mirë

dhe nëse nisemi nga rezultatet ishim në kulmin tonë. Kjo na dëmton mjaft edhe nëse kampionati rinis, pasi disa ekipe, nga sa kemi parë në rrjetet sociale, që janë para nesh dhe favorizohen për sa i përket formës fizike. Të mbash ritmin e stërvitjeve me një program individual është tepër e vështirë. Unë personalisht në Zvicër nuk e kam ndier, por shokët e ekipit në Shqipëri më thonë se është e pamundur për shkak se gjithçka është izoluar", theksoi fillimisht mesfushori i Skënderbeut.

KARANTINIMI - Më tej 23vjeçari nga Tërnovci u ndal edhe te pjesa që e shqetëson më shumë. Vërtet ka mbetur jashtë kufijve shqiptarë, por nuk është "pro" karantinimit për 14 ditë të tjera. Ai mendon se dy javë të tjera larg ekipit do ta dëmtonin edhe më shumë për rinisjen e kampionatit. "Ne po flasim për rifillim dhe kjo do të ishte gjëja më e mirë. Pa aktivitet është e pamundur të kërkosh financa dhe për pasojë për të gjithë bëhet e vështirë, pasi jemi profesionistë dhe mbajmë familjen me këtë punë. Por në bazë të asaj çfarë është vendosur në Shqipëri, që çdo shtetas që shkel riatdhesohet duhet të qëndrojë 14 ditë në izolim, nuk më duket normale. Ne më mirë të mos kthehemi, pasi humbasim sezonin. Është e pamundur që në rast se rifillon kampionati të qëndrojmë dy javë në karantinë. Kjo do të na penalizonte shumë dhe do të humbisnim sezonin deri në fund të tij. Nuk do të kishim mundësi të stërviteshim me ekipin dhe do të ishim jashtë forme në momentin e fillimit të kampionatit. Duhet të gjendet një zgjidhje paraprake që të mos na dëmtojë", përfundoi prononcimin e tij Shqiprim Taipi. LLAZI SARO