10 raste pozitivë në Serinë A, takim “nul” mes federatës dhe shkëncëtarëve

Vazhdojnë rastet me "COVID" dhe bisedimet për rinisjen

Ndërsa klubi i Fiorentinës dhe i Sampdorias jepte përgjigjen e rezultateve të para të tamponëve, e cila ishte një tërmet i vërtet në klubin vjollcë e dorian, në Romë po zhvillohej një takim mes krerëve të Federatës Italiane të Futbollit (FIGC) dhe Këshillit Teknik Shkencor (CTS), lidhur me protokollin dhe masat që duhen marrë dhe ndërmarrë, në rast se gjatë rinisjes rezulton një agravim apo një shtim infektimi me koronavirus.

- Por për të shtuar lajmet e këqija, tamponët kanë nënvizuar se në radhët e Fiorentinës kanë rezultuar pozitivë 3 futbollistë (emrat sipas protokollit nuk bëhen të ditur) dhe 3 pjesëtarë të stafit mjekësor. Kanë mjaftuar pak orë stërvitje dhe testet e para që klubi vjollcë të lajmërojë një buletin të vërtetë "lufte". Një tjetër bombë edhe nga skuadra e Sampdorias, e cila ka lajmëruar gjithashtu 3 futbollistë pozitivë, të cilët duke i shtuar edhe rastin e lajmëruar të mërkurën nga klubi i Torinos (1 futbollist), rastet e deritanishme në Serinë A flasim për 10 të infektuar.

- Ndërkohë, dje është mbajtur takimi i radhës mes krerëve të federatës dhe Këshillit Teknik Shkencor për mjekësinë, të cilët po punojnë për të ndërtuar një protokoll të denjë për të rinisur Serinë A dhe B dhe për të dërguar deri në fund programin. Por edhe pse në orët e fundit si ministri i Sporteve Spadafora ashtu sikurse kryeministri Konte kanë shprehur optimizëm dhe pak kurajo për të bërë të pamundurën që të rinisin, komiteti e ka studiuar me detaje protokollin e përbashkët të klubeve dhe tashmë do të raportojë në Ministrinë e Shëndetësisë, e cila pritet të ketë fjalën e fundit. Gjithsesi, nëse shpërthimet e rasteve me numra të lartë si te Fiorentina do të vazhdojnë edhe në klubet të tjera, Seria A duket e vështirë që të shpresojë rinisjen e saj.