Volejbolli post-Koronavirus, Pogoni: Ja si duhet të veprojmë
Trajneri i Barletit: Duhet të ndryshojnë shumë rregulla
I gjithë komuniteti i volejbollit në Shqipëri po pret me padurim rikthimin në parket, duke shpresuar në përmirësimin e situatës së shkaktuar nga virusi "CIVID-19". Por si mund të zhvillohet një ndeshje volejbolli në këto kushte dhe cilat duhet të jenë masat për parandalimin e infeksioneve në sallat sportive në Shqipëri? Për këtë temë është shprehur edhe trajneri i skuadrës Barleti Volej, Artan Pogoni. Në një prononcim për "Panorama Sport", Pogoni jep mendimin e tij se si duhet vepruar në rast se aktivitetet do të rinisin, duke theksuar se duhet bërë kujdes i veçantë në marrjen e masave mbrojtëse: "Mendoj se
FSHV në bashkëpunim me klubet apo shoqatat anëtare duhet të vendosin një protokoll sa me të efektshëm me qëllim mbrojtjen e të gjithë pjesëtarëve në organizimin e aktivitetit. Në një parashikim për zhvillimin e një ndeshje pa spektatorë në sportin e volejbollit të domosdoshëm janë rreth 45-50 persona. Natyrisht që duhet të ndryshojnë shumë rregulla apo mënyra të sjelluri në lojën e volejbollit, por mendoj se asgjë nuk është e pamundur karshi dëshirës dhe vullnetit për t'u rikthyer në parket. Duhet patjetër një bashkëpunim ndërmjet FSHV-së dhe ekipeve pjesëmarrëse për të dakordësuar rregullat e reja për zhvillimin e një ndeshjeje, ku kryesorja do të jetë edhe ndihma që duhet të japë federata nëpërmjet organizmave shtetërorë për bërjen e analizave apo mjeteve mbrojtëse dezinfektuese", deklaroi Artan Pogoni, i cili arriti të triumfonte në Kupën e Shqipërisë me skuadrën e Barletit, para se sezoni të ndërpritej për shkak të pandemisë.