Ish-ministri i Shëndetësisë: Mendoni për sezonin tjetër...
Kanë kaluar më shumë se 60 ditë nga fillimi i zbatimit të urdhrave administrativë kufizues dhe të gjithë rrekemi të dialogojmë me qeverinë se kur dhe si do të kthehemi në normalitetin e shkurtit 2020. Shumë pak përpjekje duket se janë bërë për të menduar se si do të mund të bashkëjetohet me ‘COVID-19’ apo përgjithësisht se si do të jetohet në një pandemi të caktuar. Ditët e fundit vëmendje të opinionit publik ka marrë edhe vijimi i aktiviteteve futbollistike. Fuqia e sportit është e gjithëpranuar. Mjafton të risjellim në vëmendje se sa ndjekës ka në ‘Instagram’ Kristiano Ronaldo apo sesa e njohur u bë Shqipëria në Francë vetëm pse skuadra jonë kombëtare mori pjesë në Kampionatin Europian 2016. Me sa duket, është fuqia e futbollit që detyroi edhe Komandantin tonë të Përgjithshëm të presë në takim zyrtar presidentin e FSHF-së apo që një tjetër politikan shumë i njohur në Shqipëri të vërë në dispozicion të mbështetjes publike ndaj projektprotokollit të hartuar nga FSHF gjithë karrierën e vet profesionale 37-vjeçare. Duket se gjithë vëmendja e federatës është përqendruar se si të përfundojë sezoni futbollistik 2019–2020. Ndërkohë që kurdo dhe sido që të mbarojë ky sezon futbollistik, do të jetë një sezon jonormal. Praktikisht do të jetë një sezon i humbur, paçka se mund të ketë dhënie trofesh. Lojtarët kanë dy muaj pa stërvitje, po ashtu edhe trajnerët. Lojtarët kanë 2 muaj që nuk kanë zbatuar as regjimin ushqimor. Mirëmbajtja e terreneve sportive është bërë e cunguar. Edhe nëse konfirmohet botërisht se ‘COVID-19’ u zhduk, do të vijohet në një situatë të pazakontë. Do të luhet në muajin korrik, kur nuk është luajtur kurrë. Do të luhet pa sportdashës. Por ç’është me e keqja, do të kompromentohet e gjithë faza përgatitore e sezonit 2020-2021. Çfarë është më e rëndësishme? Të bëhen përpjekje për të përfunduar një sezon të komprementuar? Apo të bëhen përpjekje për të filluar sa më mirë sezonin 2020-2021. Të mos harrojmë që opinionet shkencore paralajmërojnë për një rikthim të pandemisë në vjeshtë 2020. Nëse sezoni 2019–2020 mbyllet më 31 korrik 2020, kur do të mund të fillojë në mënyrë optimale sezoni i ardhshëm? Kush merret me sport, e sidomos me futboll, e di mjaft mirë sesa e rëndësishme është faza përgatitore. Qoftë për lojtarët individualisht, qoftë për trajnerin për të ndërtuar formacionin dhe modulin e lojës. Disa pyetje për projetprotokollin sanitar të përpiluar nga FSHF. Pse u dashka që skuadrat të mbërrijnë 15 minuta distancë nga njëra–tjetra kur lojtarët do të jenë pranë njëri-tjetrit për 45 minuta? Çfarë do të thotë teste të rregullta? Cila është rregullshmëria? Nuk mjafton që përgjigjet të jenë brenda orës 10 të ditës së ndeshjes. Cila është periudha dritare nga marrja e tamponit deri në orën 10 të ditës së ndeshjes? Sa teste duhet të kryhen në të gjithë vendin vetëm për një ndeshje? Kush do t’i marrë tamponët? Kush do ta përballojë koston e këtij testimi? Çfarë do të ndodhë nëse në një skuadër ka përhapje masive të sëmundjes te lojtarët dhe praktikisht nuk ka kontingjent lojtarësh për të paktën 2-3 javë? Do të shtyhen ndeshjet? Deri kur? Do të quhet mosparaqitje? Si do të vlerësohen pikët për ndeshjet që nuk mund të kryhen për këtë arsye? Çfarë është moduli elektronik për të certifikuar subjektet e autorizuara që do të hyjnë në impiant? Ku hostohet? Është i centralizuar apo i decentralizuar? Kush e akseson? Mora shkas nga shembulli i futbollit, për të ftuar këdo që të mendojmë përtej të zakonshmes. Pandemia e ‘COVID19’ është moment ideal që na u dha për të menduar ‘disruption’ në shumë aspekte të jetës. Shpresoj që ky shënim dashamirës të mos provokojë keqkuptime në botën e futbollit dhe midis sportdashësve.