Fusha neutrale, ndalohet pështyrja dhe përqafimet

Gati 4 milionë paundë për 26 mijë tamponë në total me kosto 150 paundë njëri, të cilët do të kryhen dy herë në javë në secilën prej 20 klubeve të Premier Ligës: është ky manuali mjekësor i studiuar për rinisjen e kampionatit anglez në mes të muajit qershor. Një objektiv që pritet të marrë edhe OK-in e klubeve në videokonferencën që do të mbahet sot, ku do të përcaktohet edhe protokolli shëndetësor. Ndër gjërat e ndaluara do të jetë edhe pështyrja e futbollistëve në fushë. Mjekët kanë kërkuar ndëshkim me karton të verdhë për lojtarët që thyejnë rregullat sanitare. Ata kanë frikë se pështyma mund të bëhet shkak i infektimit të futbollistëve. Lojtarët janë udhëzuar gjithashtu që të udhëtojnë në stadiume me autobusë të ndryshëm dhe që të përdorin bërrylat dhe jo gishtat për të shtypur butonat e ashensorëve. Me Koronavirusin që thuhet se mbijeton deri në 72 orë në sipërfaqe, topat do të sterilizohen dhe lojtarët do të këshillohen që të mos mbahen me njëritjetrin gjatë ekzekutimit të goditjeve të këndit. Nuk do të ketë as përqafime gjatë festës së golave. Propozim tjetër është që ndeshjet e mbetura të zhvillohen në 10 fusha neutrale. Klubet e pjesës së poshtme të klasifikimit kishin në plan të bëheshin bashkë kundër rinisjes së sezonit, me shpresën për të bllokuar rënien e tyre, por ato janë kërcënuar nga të mëdhatë se nëse bëjnë një pakt të tillë, atëherë ato do të votojnë që ato të bien nga kategoria.

Rasti i fundit - "Pavarësisht të gjitha masave, ne kemi një tjetër futbollist pozitiv". Shefi i Brajtonit, Pol Barber, konfirmoi dje se klubi i Premier Ligës ka diagnostikuar futbollistin e tretë me "COVID-19". Dy lojtarë të "Pulëbardhave" rezultuan pozitivë më 26 mars dhe 2 prill, por tashmë është konfirmuar edhe një rast i tretë, duke shtuar pasigurinë për rinisjen e stërvitjes më 18 maj. Ai është izoluar, ndërsa mësohet se nuk ka patur kontakt me lojtarët e tjerë.