Provokon presidenti i Crvena Zvezdës: “Liga e përbashkët, ide e Edi Ramës”
Basket/ Deklarata nacionaliste nga Nebojsha Çoviç
Në Shqipëri dhe Kosovë kryesisht po shikohet me pozitivitet krijimi i ligës së përbashkët të basketbollit, që do të shërbente për rritjen e cilësisë së këtij sporti në të dyja vendet, ku mendohet të ftohen edhe skuadra nga Maqedonia e Veriut. Një projekt që është konfirmuar nga të dyja federatat respektive, madje në Kosovë janë edhe më optimistë, teksa mendohet që mund të startohet në vjeshtën e këtij viti. Por kjo ide, me sa shihet, nuk është pritur aspak mirë në Serbi, ku po merr ngjyra politike dhe nacionaliste. Pas komenteve ekstremiste të mediave serbe, është prononcuar edhe Nebojsha Çoviç, presidenti i klubit të basketbollit Crvena Zvezda. Coviç, një ishpolitikan serb, që njihet gjithashtu për qëndrimet e tij antishqiptare, e ka quajtur këtë iniciativë si një provokim të qëllimshëm. "Çdo veprim i Prishtinës dhe Tiranës është një provokim i qëllimshëm, pavarësisht në cilën fushë bëhet fjalë, këtë herë në sport. Para dy-tri vitesh, një klub nga Prishtina ka tentuar të hyjë në Ligën ABA. Nuk ka mundur pasi kalueshmëria në ligën e parë dhe ligën e dytë të ABA-s, ku është në
mes Kosova, bëhet ekskluzivisht përmes Serbisë. Pavarësisht të gjithave, ne në basketboll Kosovën dhe Metohinë e konsiderojmë pjesë integrale të Serbisë, nën mbikëqyrjen e veçantë të bashkësisë ndërkombëtare, e cila gjithnjë e më shumë ngjan në një okupim klasik", ka deklaruar Çoviç. Presidenti i klubit serb shton se liga e përbashkët Shqipëri-Kosovë nuk do të ketë asnjë lidhje me Ligën ABA (Liga e Adriatikut, e cila është themeluar në vitin 2001, ku marrin pjesë ekipe nga Bosnjë-Hercegovina, Kroacia, Mali i Zi, Maqedonia e Veriut, Serbia
dhe Sllovenia). Ndërsa më pas vijon me deklaratat antishqiptare: "Kjo që kanë menduar nuk mund të jetë e ngjashme me Ligën ABA dhe nuk do të mundet që prej saj të shkohet në Ligën ABA. Liga ABA vlen vetëm për rajonin që paraqet ish-Jugosllavinë. Ndoshta mendojnë se mund të bëjnë diçka të ngjashme, duke ditur që shqiptarët kanë pretendime territoriale ndaj Serbisë, të cilat tashmë i kemi parë. Çdo ditë shohim pretendimet e tyre ndaj Maqedonisë dhe ndaj Malit të Zi. Nuk e fshehin që kanë edhe ndaj Greqisë. Ndoshta kështu mendojnë të bëjnë një ligë Tiranë-Prishtinë. Duke pasur parasysh që Edi Rama është artist dhe i dhënë pas sportit, pasi gjithnjë mban atlete 'Adidas', ndoshta i ka shkuar në mendje që ABA të bëhet 'Albanska Basketbol Asocijacija' (Asociacioni i Basketbollit Shqiptar)", është shprehur Çoviç për "novosti.rs".