Gjirokastritët, shpresë për një... mrekulli
Për tifozët e Luftëtarit, rifillimi në këtë periudhë rrezikon shëndetin e lojtarëve
Qyteti i Gjirokastrës nuk ka asnjë të prekur nga Koronavirusi, megjithatë sportdashësit bluzinj tregohen skeptikë për rinisjen e kampionatit. Një grup sportdashësish gjirokastritë, për "Panorama Sport" deklarojnë se në kushtet që kaloi vendi ynë, por jo vetëm, vështirë se bëhet fjalë për futboll. "Futbolli i vendit tonë nuk e ka luksin që kanë vendet e tjera, pasi të tilla janë mundësitë reale të shëndetësisë. Futbolli është lojë grupi dhe kërkon interpretim në fushë. Ne si tifozë të Luftëtarit jemi për të mos u luajtur ndeshjet e mbetura, jo se skuadra jonë është në vendet e fundit të klasifikimit, por se mbi të gjitha qëndron shëndeti i lojtarëve. Si tifozë të Luftëtarit kemi dhe një apel për FSHF-në, edhe pse zëri ynë vështirë se dëgjohet: Kampionati të ndalohet në gjendjen që është dhe të shtohen numrat e skuadrave sezonin e ardhshëm.
Një kampionat me 10 skuadra edhe për tifozët bëhet i bezdisshëm, pasi humbet bukurinë dhe shkëlqimin, bëhen ndeshje bajate. Kemi një jetë që e ndjekim dhe struktura aktuale nuk është e duhura. Ky është mendimi ynë", deklarojnë fanatikët e Luftëtarit. Ndryshimi i formulës së kampionatit prej kohësh është shndërruar në temë të nxehtë diskutimi brenda qarqeve futbollistike. Për tifozët gjirokastritë ideale për
vendin tonë do të ishte një kampionat me 16 ose 18 skuadra dhe me dy faza.
ECURIA- Luftëtari në 26 javët e luajtura në kampionat pozicionohet në vendin e nëntë me 14 pikë të grumbulluara, 3 më shumë se Flamurtari i vendit të fundit. 2 fitore, 8 barazime dhe 16 humbje "arkivon" Luftëtari në periudhën para Koronavirusit.
STADIUMI- Punonjësit e stadiumit " Gjirokastra" vazhdojnë me mirëmbajtjen e impiantit, me ujitjen e fushës si dhe korrjen e barit rreth pistës. Temperaturat e larta të 23 ditëve të fundit që kanë shoqëruar "qytetin e gurtë" kanë mjaftuar për të mos ulur për asnjë çast tempin e punës së punonjësve. Madje, punonjësit e fushës janë duke punuar për pastrimin e shkallëve dhe ndenjëseve nga barërat.