Mateo Ortolani, dinamoviti me idhuj Inzagin dhe Totin

Me ardhjen në krye të Dinamos të presidencës italiane disa muaj më parë, fanellën blu e kanë veshur disa lojtarë nga vendi fqinj. Damiano Pontrelit, djalit të presidentit Marko Pontreli, i janë bashkuar edhe Niko Paterni, Kristian Dovidio dhe Mateo Ortolani, përveç stafit teknik. Ortolani, 19 vjeç, luan si sulmues. Ai dhe Paterni e kanë kaluar në Tiranë periudhën dymujore të karantinës. Për emisionin "Taca La Marca" të "Radio Musica Television", Mateo Ortolani, i datëlindjes 2000, ka rrëfyer aventurën me Dinamon. Ai ka idhull Totin, edhe pse është rritur te të rinjtë e Milanit. Në Shqipëri vjen pas përvojave me Kuneon dhe Ternanën në Itali, si dhe Achairnakos në Greqi.

DINAMO - "Fati e deshi të njihja presidentin e Dinamos së Tiranës, i cili më dha mundësinë të provohem dhe e shfrytëzova rastin, duke shënuar gol në një ndeshje kontrolli dhe kështu bindja klubin që të besojë tek unë. Në Itali kam pasur pak mundësi, sepse, për fat të keq, meritokracia nuk vlerësohet. M'u dha ky shans me Dinamon dhe kam luajtur 8 ndeshje. Vendosa të transferohem jashtë Italisë për të realizuar ëndrrën time. Me Dinamon kam firmosur një kontratë 3-vjeçare dhe jam i kënaqur me këtë zgjedhje. Trajneri Kamarata? Më pëlqen të shoh videot e sulmuesve të mëdhenj dhe në këtë pikëpamje jam me fat që kam trajner një ish-sulmues race si Fabricio Kamarata. Flasim për një person të përulur, që gjithmonë jep këshilla, sidomos për mua, duke qenë se ka pasur karakteristika të njëjta me mua. Për fat të mirë, në Shqipëri u treguan të aftë për të bllokuar gjithçka për të evituar infektimin. Presidenti i Dinamos, Marko Pontreli, na ka mbrojtur në mënyrë më të mirë, duke na vënë në dispozicion dhomat e një hoteli për ne që vijmë nga jashtë. E konsideroj një baba të dytë, është vërtet e vështirë të gjesh persona të tillë në botën e futbollit", thotë sulmuesi.

IDHUJT - "Më pëlqen të luaj gati në linjën e pozicionit jashtë loje, pasi jam i shpejtë dhe me këmbët manovroj mirë. Burim frymëzimi për mua është sigurisht Filipo Inzagi. Objektivi? Të rritem sa më shumë. Jam shumë i kënaqur që mbaj fanellën e një klubi prestigjioz si Dinamoja e Tiranës. Dëshira ime është që të gjej golin e parë në futbollin profesionist. Kin dhe Vinjato janë lojtarë të shkëlqyer që kanë të njëjtën moshë, por vlerësoj shumë Xaniolon, i cili edhe pse shumë i ri në moshë, arrin të bëjë diferencën me fanellën e Romës. Më pëlqen edhe Kutrone dhe mendoj se është pak i vlerësuar. Idhulli është Françesko Toti. Kur flas për të më shkëlqejnë sytë, në dhomën time kam posterin e kapitenit, jam dashuruar me këtë sport falë tij", përfundon lojtari i Dinamos.