Tri raste pozitive në Spanjë, Tebas: Të nisim më 12 qershor

Skuadra e Vajadolidit preket nga "COVID-19"

La Liga mund të fillojë në 12 qershor. Ky është lajmi i fundit që vjen nga Spanja dhe kjo është dëshira e madhe e presidentit Havier Tebas. Edhe pse nuk është ende zyrtare, ai ka lënë të kuptohet se në këtë datë mund të nisë ndeshja e parë pas periudhës së Koronavirusit. "Do të më pëlqente që ta rinisnim sërish kampionatin në 12 qershor, por nuk mund ta them zyrtarisht diçka të tillë. Gjithçka do të varet nga mënyra si do të zhvillohen ngjarjet rreth Koronavirusit, ulja e rasteve dhe shumë të tjera. Do të kemi futboll thuajse përditë në muajin e ardhshëm. Rregullat? Do të duhet të mësohemi me ndryshimet dhe zbatimin e protokollit. Ndeshjet do të jenë njëlloj, por pa tifozë. Nuk është e njëjta gjë për lojtarët, por duhet të përshtatemi të gjithë në këtë botë të re. Lojtarët duhet të bëjnë kujdes edhe kur kthehen në shtëpitë e tyre që të mos përhapin virusin", tha

Tebas. Presidenti i La Ligës foli edhe për rastet me virus. "Deri tani janë konfirmuar 5 raste, por ne prisnim 25-30 duke parë zhvillimet edhe në Bundesligë. Në Spanjë situata po përmirësohet, jo vetëm në futboll. Duhet të jemi të përgjegjshëm dhe të zbatojmë rregullat", ka thënë

më tej presidenti i La Ligës.

- Tri raste të tjera pozitive i janë shtuar kampionatit spanjoll duke e çuar në tetë në total numrin e anëtarëve të futbollit me "COVID-19". Bëhet fjalë për ekipin e Vajadolidit, i cili është në pronësi të Fenomenit Ronaldo. Ky i fundit

kishte thënë se analizat kishin dalë negative, por në fakt në përgjigjet përfundimtare janë 2 futbollistë dhe një pjesëtar i stafit që kanë rezultuar pozitivë. "Do t'ia dalim të gjithë bashkë dhe do ta kalojmë këtë moment negativ", ishte mesazhi i Ronaldos në rrjetet sociale. Tre

pjesëtarët e klubit të Vajadolidit janë futur në karantinë dhe do të bëjnë analiza gjatë këtyre ditëve për të kuptuar nëse e kanë kaluar virusin apo janë mbartës së tij. La Liga nuk ka ndërmend që të ndalet edhe nëse do të jenë 5 futbollistë pozitivë në një skuadër.