Maldini: Rangnik të mësojë respektin, pastaj italishten
Drejtori: Nuk e kuptoj me kë ka folur nga Milani
Që në thashethemet e para ai ishte kundër hipotezës dhe pozicioni i tij nuk ka ndryshuar as pas thuajse pesë muajsh. Jo vetëm kaq, por Paolo Maldini i cilëson si shkelje të rregullave kërkesat e Ralf Rangnikut për të qenë fuqiplotë te Milani në rast se pranon ofertën e klubit italian. Legjenda kuqezi njëkohësisht e fton gjermanin që të merret me përsëritjen e koncepteve të respektit, sidomos kundrejt atyre njerëzve që në mënyrë profesionale po vendosin të mirën e Milanit përpara krenarisë. Në një deklaratë për agjencinë e lajmeve "ANSA", Paolo Maldini ka shpërthyer duke nënvijëzuar edhe një herë mendimin e tij. "Duke mos pasur folur kurrë me Rangnikun nuk e kuptoj se mbi çfarë bazash flet kur deklaron qëllimet e tij kundrejt Milanit. Habia ime vjen edhe nga fakti që askush nga pronarët nuk më ka thënë kurrë asgjë lidhur me këtë temë".
KËSHILLA - Pasi mposhti "COVID-19", Paolo Maldinin e pret një tjetër vështirësi, siç është ajo e rinovimit të bashkëpunimit me Milanin. Në horizont është një takim me Ivan Gazidhisin, që, me sa duket, do të sjellë pak lajme pozitive në konfirmimin e legjendës në detyrën që ka aktualisht (drejtor teknik). Në pritje të ballafaqimit me administratorin e "Djallit", Maldini shton dozën e shigjetimeve për Rangnikun, duke theksuar: "Disa gjëra duhen marrë seriozisht në konsideratë. Rangnik, duke folur për një rol fuqiplotë brenda Milanit, pra drejtor dhe trajner, po përdhos haptazi sektorë ku aktualisht punojnë profesionistë që me klubin i lidhin kontrata ta rregullta". Në rast zbarkimi të gjermanit te kuqezinjtë, bëhet edhe më e ndërlikuar të imagjinosh një bashkëjetesë mes tij dhe Maldinit, i cili si në kohët e vjetra, ofron një sparkatë në deklaratën e tij kur "këshillon" Rangnikun. "Në këto kushte më lind natyrshëm edhe një këshillë për Rangnikun, ndaj i them se përpara se të zhytet në mësimin e italishtes, duhet të përsërisë edhe një herë konceptet e përgjithshme të termit 'respekt'. E gjitha kjo sepse rrotull ka kolegë që, pavarësisht vështirësive të momentit, po mundohen ta përfundojnë sezonin në mënyrë profesionale, duke paravendosur Milanin në vend të krenarisë personale", përfundoi Maldini.