Aprovohen stërvitjet në grup nga 18 maji, Italia bën prova për rinisjen
Qeveria jep OK-in, por rastet pozitive mund të hedhin gjithçka në erë
Ashtu siç ishte parashikuar, vjen edhe drita jeshile e qeverisë italiane për stërvitjen kolektive në futboll. Ministrat përgjegjës të Shëndetësisë dhe Sportit, Speranca dhe Spadafora, lëshuan një deklaratë të përbashkët që i hap rrugën stërvitjes në grup, por me kujdes maksimal. "Mendimi i kërkuar nga qeveria për protokollin e prezantuar nga federata u shpreh nga Komiteti Tekniko-Shkencor dhe konfirmoi linjën e kujdesit deri tani të ndjekur nga ministrat kompetentë. Instruksionet e komitetit, që konsideroheshin shtrënguese dhe detyruese, do t'i transmetohen federatës për të bërë rregullimet e nevojshme të protokollit në mënyrë që të lejojë rifillimin e sigurt të stërvitjeve të skuadrave në grup duke nisur prej 18 majit". Me t'u arkivuar kjo çështje, tani në tavolinë mbetet për t'u përcaktuar nëse do të jetë e mundur rinisja e kampionatit. Po, sepse janë dy aspekte, sidoqoftë, të lidhura që nuk japin domosdoshmërish OK-in për rinisjen e sezonit.Duhet theksuar që rikthimi në stërvitje nuk do të thotë që Seria A e ka të sigurt rinisjen. Në pritje për të kuptuar sesi do të reagohet në rastet e mundshme pozitive me "COVID"brenda një skuadre, një tjetër pikë e rëndësishme për rinisjen duhet të jetë edhe rezultati i testeve kardiovaskulare, që duhet me çdokusht të përjashtojë çdo lloj rreziku për ata që kanë kontaktuar virusin. Hapat do të jenë kështu shumë të kujdesshëm dhe të vëmendshëm ndaj kurbës epidemiologjike dhe përcaktimit të kalendarit. Për momentin, nuk ka ende një datë rinisjeje, edhe pse objektivi është rikthimi në fushë gjatë fundjavës së 13-14 qershorit. Objektiv që mbetet ende i lidhur me disa çështje për t'u zgjidhur dhe hapa të detyrueshëm. Java që sapo ka nisur është në fakt një javë ku do të ketë shumë takime të rëndësishme. Nesër janë takimet e asamblesë së Ligës, por edhe do të bëhet informimi i parlamentit nga Spadafora, ndërsa kryeministri Konte do të ketë gjithashtu një takim me botën e sportit.