Kapelo: Na hoqën padrejtësisht dy tituj
Fabio Kapelo i rikthehet temës së "Calciopoli"-t dhe dy titujve që i mungojnë skuadrës së tij që i fitoi në fushë. Gjatë një interviste për "Corriere dello Sport", ish-trajneri i Juves komenton nga situata e Koronavirusit deri te favoritet për të triumfuar këtë sezon.
Jeni i kënaqur për rinisjen e stërvitjeve kolektive?
Po, sepse futbolli u jep punë 100 mijë personave në Itali dhe si sportist mendoj se titulli fitohet dhe humbitet në fushë.
A mundet një infektim i ri të ndalojë përsëri gjithçka?
Po, nuk ndryshojnë rregullat e infektimit nga virusi. Për këtë kam propozuar një turne që do të zgjasë 40 ditë në një qendër grumbullimi si në Botëror. Duhet ta dimë se duke u kthyer në shtëpi, mund të infektohen gra, fëmijë dhe miq. Zgjidhja e Gjermanisë do të ishte ideale. Por në Itali është gjithçka më e vështirë. Kemi një dobësi për t'i vështirësuar gjërat.
Mendoni se koha e pakët përgatitore mund të rrezikojë dëmtimet e futbollistëve?
Ua kam frikën dëmtimeve më shumë sesa virusi. Lojtarët kanë punuar për dy muaj në shtëpi me shumë kufizime dhe tani kanë dëshirë për t'u rikthyer menjëherë në formë. Rreziku i dëmtimeve muskulore është i lartë që në stërvitje. Nëse do të luhen 3 ndeshje në javë, rikuperimi fizik nga një ndeshje në tjetrën do të jetë i vështirë.
A mund ta favorizojnë Juventusin 5 zëvendësimet gjatë një ndeshjeje?
Vetëm në rast se Lacio dhe Interi do të kenë shumë dëmtime. Skuadrat e kreut kanë përforcime cilësore për ta kursyer një titullar që të luajë 20 minuta më pak.
A i favorizon bardhezinjtë anulimi i kupave?
Në teori po, por është koka ajo që e bën diferencën dhe jo trupi. Kokën në rregull e ka mbi të gjitha Lacio, që i ka mbajtur në Romë të gjithë futbollistët e vetë.
Mendoni ende se ky mund të jetë sezoni i Interit?
Testi për Antonion do të jetë viti i ardhshëm. Duhet kohë për të hyrë në mentalitetin e lojtarëve. Por është një situatë aq e paparashikueshme sa gjithçka është e mundur, edhe një përmbysje.
Vazhdon të flitet për "Calciopoli"-n në Itali dhe titujt e Juves...
Moxhi dhe Xhiraudo ishin drejtues të mëdhenj dhe ne kemi fituar në fushë. "Calciopoli" na hoqi dy tituj që ua dhuroi të tjerëve.