Sporti në zi, ndahet nga jeta akademiku Gudar Beqiraj

Dita e djeshme shënoi një ngjarje të hidhur për të gjithë komunitetin e sportit në Shqipëri. Ish-presidenti i Federatës së Peshëngritjes dhe ish-kryetari i Akademisë së Shkencave, Gudar Beqiraj, u nda nga jeta pikërisht në ditën kur mbushi 72 vjeç. Beqiraj, njëri prej kontribuuesve më të fuqishëm në fushën e arsimit, shkencës dhe sportit, vdiq si pasojë e një sëmundjeje. Ai u diplomua në vitin 1971 në Universitetin e Tiranës në degën e matematikës, ndërsa në vitin 1986 u specializua në fushën e gjeostatikës në Fontablë të Francës. Për 37 vite, Beqiraj shërbeu si pedagog i matematikës. Në vitin 2017, ai drejtoi Akademinë e Shkencave, ndërsa ka qenë dhe anëtar i KQZ-së në vitin 1996. Gudar Beqiraj i shërbeu dhe sportit, sidomos peshëngritjes, të cilin e ushtroi në rini. Ai drejtoi Federatën Shqiptare të Peshëngritjes në vitet 1992-2000, ndërsa ushtroi funksionin e zv.kryetarit të Komitetit Olimpik Kombëtar Shqiptar në vitet 19962000. Beqiraj së fundmi mbante rolin e presidentit në Shoqatën e Veteranëve të Peshëngritjes, ndërsa për shumë vite ka qenë edhe gjyqtar ndërkombëtar i shtangës. Një lajm i hidhur për të gjithë sportin në vend, që humbet kështu një prej kontribuuesve më të shquar. Për ndarjen nga jeta të Gudar Beqirajt ka reaguar edhe Akademia e Shkencave, e cila nëpërmjet një postimi në rrjete sociale i bën homazhe akademikut të mirënjohur. Ja dedikimi i bërë nga kryesia e Akademisë së Shkencave: "Gudar Beqiraj ishte një nga anëtarët e asamblesë me më shumë gjurmë në jetën institucionale të Akademisë së Shkencave. Ndarja e tij nga jeta është një humbje e madhe për Akademinë tonë të Shkencave, për bashkësinë e studiuesve të fushave ku ai veproi, për miqtë e shumë në universitete brenda dhe jashtë vendit, për qytetarët e shumtë me të cilët e patën lidhur interesat e tij të fuqishme dhe ndjenjat e fisme njerëzore. Gudar Beqiraj ishte njeriu i kërkimit dhe i pasioneve, i punës dhe drejtimit shkencor, i përgjegjësive administrative dhe vullnetarizmit olimpik, i ekspertizës në fushën e informatikës aplikative brenda dhe jashtë vendit. Akademik Gudar Beqiraj i takon atij brezi që mori formimin bazik në Universitetin e Tiranës dhe u formua e u specializua jashtë vendit. I diplomuar në fushën e matematikës, ai plotësoi kualifikimin në fushën e gjeostatikës në qendrën e njohur të kësaj fushe në Fontablë (Francë), duke thelluar njohjen në fushën e krijuar me tezën e doktoratës 'Transformimi Fourier dhe aplikimet e tij'. Ai është ndër të parët specialistë shqiptarë të formuar në metodat e informatikës së aplikuar në fushën e gjeofizikës (Universiteti Paris VI, Francë), duke vijuar më tej me formimin përmes punës në universitetin 'La Sapienza' (Romë) dhe me drejtimin e projektit informatik katërvjeçar për regjistrimin dhe përpunimin e të dhënave të kadastrës italiane.

Gudar Beqiraj ka përfaqësuar dijen vendëse në fushën e informatikës aplikative qysh në vitet 1980, si pjesëmarrës në veprimtari të rëndësishme shkencore ndërkombëtare, si Kongresi III Botëror i Gjeostatistikës (Avinjon, 1987); në simpoziumin ndërkombëtar për zbatimin e metodave matematikore në gjeologji-miniera (1989, Çeki); në simpoziumin 'Codota' (Lids, 1990)); në simpoziumin ndërkombëtar për zbatimin e metodave matematikore në gjeologji-miniera (me një vlerësim me medalje argjendi të paraqitjes shkencore, Çeki, 1991). Që prej tri dekadash akademik Gudar Beqiraj është i përfshirë në ekspertizë dhe oponencë shkencore ndërkombëtare nga institucione jashtë vendit. Vlerësues i jashtëm në programe doktorate në Francë, specialist i ftuar për vlerësimin e projektpropozimeve në kuadrin e programit 'Copernicus' të Komisionit Europian, drejtues në projektet e Komisionit Europian 'Seeren', 'Seeren 2', 'Isotea', 'Seefire', 'See-grid', 'See-grid2', 'See-grid-sci', 'Ict-web-proms'. Gudar Beqiraj ka veprimtari universitare të pandërprerë që prej më shumë se katër dekadash, si pedagog i matematikës dhe i informatikës. Ai është autor i shumë artikujve dhe botimeve në shqip e në gjuhë të huaj në fushat ku ushtroi veprimtarinë kërkimore-shkencore. Në karrierën e akademikut Gudar Beqiraj numërohen detyra të rëndësishme, që prej atyre të drejtimit shkencor (si dekan) deri te drejtimi institucional (si drejtor i Institutit të Matematikës Llogaritëse INIMA). Gudar Beqiraj ka drejtuar Akademinë e Shkencave i zgjedhur nga asambleja në detyrën e kryetarit dhe të zëvendësit. I përjetshëm qoftë kujtimi i njeriut, kolegut, mikut dhe akademikut Beqiraj".