Protokolli sanitar, modeli gjerman i FSHF-së për rinisjen
Shqipëria është duke zbatuar një plan hapjeje të vendit dhe lehtësim të masave për njerëzit dhe një pjesë të madhe të kategorive të bizneseve, por ende nuk ka asnjë vendim zyrtar shtetëror se çfarë do të ndodhë me sportin. FSHF ka vendosur edhe datat e rifillimit të aktiviteteve në të gjitha kategoritë. Deri më tani ka patur dy takime në nivel ekspertësh mes Ministrisë së Shëndetësisë dhe Federatës Shqiptare të Futbollit për të diskutuar pikërisht në lidhje me protokollin e propozuar nga federata. Kjo e fundit, me anë të stafit mjekësor të Kombëtares si dhe të tjerë ekspertëve në fushën e mjekësisë, ka përshtatur modelin gjerman të masave. "Ky koncept i komunikohet Ministrisë së Sporteve dhe asaj të Shëndetësisë, të cilat më pas duhet të shpalosin kushtet në të cilat është e mundur të rifillojnë stërvitjet dhe kampionatet", citohet ndër të tjera në draft-protokollin sanitar, për të vënë në dijeni ministritë përkatëse.
ZONAT E VEPRIMIT
Sipas protokollit do të ketë një planimetri të ndarë me tri zona, ku specifikisht saktësohet cilët punonjës qëndrojnë, sasia e tyre dhe sigurisht duke respektuar masat sanitare personale, qoftë për dezinfektimin, apo edhe vendosjen e dorezave dhe maskave, me përjashtim të lojtarëve dhe arbitrave në fushë.
TESTET
Siç specifikohet edhe në protokoll, parashikohet që të ketë teste sa më të shpeshta për skuadrat: "Koncepti gjithashtu parashikon teste të rregullta për virusin Korona për lojtarët dhe stafin teknik. Ndër të tjera, duhet që rezultatet e testit të lojtarëve të bëhen të ditura jo më vonë se ora 10 e mëngjesit të ndeshjes". Është vendosur që të ketë kontrolle për temperaturën çdo ditë dhe para e pas çdo ndeshjeje. Në rast se do të ketë persona që shfaqin rritje të temperaturës, atëherë do të ndiqet me kujdes rasti për të vijuar më pas me testimin e posaçëm për "COVID".
PREDISPOZITAT PËR KLUBET
Lidhur me pjesën e grumbullimeve stërvitore, ndeshjeve futbollistike etj., sipas protokollit të OBSH-së dhe rekomandimit të mjekëve, duhen ndjekur dhe zbatuar udhëzimet e mëposhtme në mënyrë rigoroze: - Së pari, të gjitha ndeshjet do vijojnë me dyer të mbyllura.
- Së dyti, të ketë shërbim mjekësor sanitar, të pajisur me skaner për matjen e temperaturës në hyrjen e stadiumit, për të gjithë.
- Së treti, një dokument me të gjitha normat higjieno-sanitare të adoptuara në secilin impiant sportiv, përpara zhvillimit të çdo eventi.
- Së katërti, një modul elektronik për të certifikuar subjektet që do të hyjnë në impiant.
- Së pesti, të vendosen dezinfektues duarsh në të gjitha mjediset; - Së gjashti, të gjitha stafet të qëndrojnë me maska dhe doreza gjatë punës: Përdorimi i maskave dhe dorezave është i detyrueshëm sidomos gjatë udhëtimeve të ekipeve, pra në autobusë, në furgonë dhe çdo grumbullim tjetër të detyrueshëm në vende të mbyllura;
- Së shtati, hotel ekskluziv për ekipin ose katin / zonat ekskluzive për të shmangur kontaktin me vizitorët e tjerë të hotelit.
- Së teti, minimizoni kohëzgjatjen e qëndrimit në dhomat e zhveshjes. - Së nënti, stafet mjekësore të klubeve dhe akademive, të jenë në kontakt të pandërprerë me autoritetet mjekësore të zonave përkatëse lidhur me raste të mundshme apo të dyshuara. Çdo rast, qoftë edhe i një simptome gripi të lehtë duhet raportuar dhe ndjekur me kujdes", janë ndër të tjera pikat që duhet të zbatojë çdo ekip në Shqipëri. Organizimi i ndeshjes
Do të ketë një protokoll specifik për mediat, kufizimin e intervistave, si dhe për futjen apo daljen e ekipeve nga dhomat e zhveshjes.
- Nuk duhet të dalin/futen në të njëjtën kohë.
- Nuk duhet të ketë rreshtim dhe takim duarsh para ndeshjes, apo fotografim të ekipeve.
- Çdo person i autorizuar të vendoset me hapësirë 2-3 ndenjëse nga një tjetër. Skuadrat do të kenë delegacione të pranishme në tribunë deri në dhjetë persona me distancë disa metra nga njëri-tjetri.
NDARJA E HAPESIRAVE TE STADIUMIT NE ZONA Stadiumi do të jetë i ndarë në tre grupe personash sipas karakteristikave të aktivitetit që kryejnë (Zona): Grupi i kuq (Zona1, Fusha) përbëhet nga lojtarët, trajnerët, stafi teknik dhe gjyqtarët. Grupi blu (Zona2, Tribuna) përbëhet nga punonjësit e transmetimeve TV, Stafi dhe Delegacionet e ekipeve dhe disa nga përfaqësues të tjerë të mediave. Ky grup mund të hyjë edhe në stadium, por duhet të mbajë një distancë nga grupi i gjelbër (Zona 1). Grupi i verdhë (Zona 3, Përreth Stadiumit) përfshin përfaqësues të tjerë të mediave dhe punonjës të tjerë. Pjesëtarët e këtij grupi mund të qëndrojnë vetëm jashtë territorit të Stadiumit.