Luftëtari, stërvitja nis me lojtarët vendës
Luftëtari zbret i përgjysmuar në fushë, duke respektuar rregullat deri në dhënien e lejes për t'u stërvitur normalisht. Pasi u mësua data e nisjes së kampionatit, trajneri Neritan Novi, ndihmësi i tij, Arbër Bistri, dhe drejtori i akademisë, Nalton Musta, menduan të bënin një program pune duke stërvitur në kushtet e distancimit lojtarë të ekipit të parë dhe akademisë. Dje "Panorama Sport" ndoqi seancën e zhvilluar në kompleksin "Fusha e Vjetër" në Gjirokastër. Nga futbollistët e ekipit të parë ishin emra si kapiteni Aurel Demo, portierët Avernold Qyrani dhe Sadik Basha, mesfushorët Stiven Puci, Alvi Ahmetaj dhe Klaus Alinani, sulmuesi Ardit Ziaj, si dhe futbollistët e ardhur nga të rinjtë, Serxhio Emini, Bastri Malaj dhe Muharrem Malaj. Të ndarë në grupe ata kanë zhvilluar më shumë stërvitje me topin, për të rifituar kohën e humbur. Secili prej lojtarëve të Luftëtarit në këtë periudhë ka zhvilluar stërvitje individuale, në pamundësi për të bërë në grup, edhe pse qyteti i Gjirokastrës konsiderohet zonë e gjelbër dhe nuk ka asnjë të prekur nga Koronavirusi. Gjithsesi, klubi i Luftëtarit është munduar të zbatojë me përpikmëri rregullat e pandemisë prej "COVID-19". Dje kompleksi stërvitor ka qenë i izoluar, ndërkohë që sot dhe nesër pritet që futbollistët e Luftëtarit që janë nga rrethet e tjera, të mbërrijnë në Gjirokastër, për të nisur zyrtarisht përgatitjet më 18 maj. Të vetmit lojtarë që këtë periudhë kanë qenë jashtë Shqipërisë janë mesfushori Donaldo Açka dhe mbrojtësi Andon Karabina.