Sot “xhiro” e dytë e tamponëve, Interi gjen edhe hotelin e karantinës
Testet anti-Koronavirus, do t'u nënshtrohen edhe Konte me stafin
Një tjetër "xhiro", sërish vrapime. Interi vazhdon pa ndalur, Antonio Konte nuk u lejon ndalesa lojtarëve për seancat individuale, tani që po afron edhe rinisja e stërvitjeve në grup. Dhe sot stafi mjekësor zikaltër do të ndihmojë lojtarët me "xhiron" e dytë të tamponëve dhe testeve anti-Koronavirus. Këtë herë do t'u nënshtrohen të gjithë, si futbollistët që e kanë bërë javën e kaluar, po ashtu edhe trajneri dhe pjesëtarët e stafit zikaltër që në "xhiron" e parë nuk ishin testuar, për shkak të mangësisë së gatishmërisë së tamponëve në rajonin e Lombardisë. STËRVITJE NËN SYTË E MAROTËS - Siç dihet, Lukaku e Handanoviç me shokë janë rikthyer të stërviten në "Appiano Gentile", gjithmonë duke respektuar protokollin
qeveritar: së paku deri më 18 maj lejohen vetëm seancat individuale dhe tek Interi për momentin po ndahen në tri grupe (me orare të ndryshme) nëpër fushat e qendrës sportive. Sipas raportimit të mediave italiane, pas rrebeshit të ditëve të fundit reshjet janë pakësuar dhe të gjithë kanë mundur të stërviten me
më shumë efikasitet, nën sytë e kujdesshëm të administratorit të deleguar Xhuzepe Marota.
- Siç referon emetuesi italian, masat paraprake që klubi zikaltër ka parashikuar nuk ndalen te tamponët dhe testet e gjakut. Duke qenë se duhet të qëndrojnë në grumbullim të izoluar
për së paku 14 ditë, në fakt, parashtrohet edhe problemi i prenotimit. Në këtë aspekt, duke qenë se në "Appiano" ndodhen diçka më pak se 30 dhoma, Interi do të mbështetet te një hotel në afërsi ku do të mund të qëndrojë njëra pjesë (dhe tjetra në "Pinetina") për natën. Për shkak të emergjencës sanitare, realizimi i hotelit të ri në brendësi të qendrës aktuale ka pësuar një ngadalësim. Duhet të kishte qenë gati brenda këtyre ditëve, por do të përfundohet gjatë muajve të ardhshëm. Kështu do të mund të qëndrojnë gjithë futbollistët dhe stafi teknik, që ndërkohë po përpiqen të rinisin dhe të lënë pas krahëve këtë pandemi.