Partizani zbret në fushë, “humb” Romero
Puna ka vijuar me masa shtesë, Romero sërish larg ekipit
Partizani i ka dhënë fund zyrtarisht periudhës së karantinës dhe nga paraditja e djeshme ka nisur përgatitjet në terren për 10 ndeshjet e mbetura të kampionatit. Kjo pjesë e mbetur ka shumë rëndësi për kampionët në fuqi, pasi për momentin skuadra e drejtuar nga trajneri Adolfo Sormani është pa biletë për Kupat e Europës. Fillimi i punës ka qenë i pazakontë, pasi dihet se tashmë futbolli është ndarë në dy periudha, para dhe pas "COVID-19". Në orën 9 të mëngjesit të djeshëm, të kuqtë e kryeqytetit kanë rinisur përgatitjet, që vijnë pas ndërprerjes 66-ditore si pasojë e pandemisë. Nën drejtimin e trajnerit Sormani, stafit teknik dhe atij mjekësor, të gjithë lojtarët kanë zhvilluar seancën e parë të programuar në kompleksin sportiv "Fooball Republic". Përgatitjet nga dje dhe në vazhdim do të zhvillohen duke respektuar protokollet e sigurisë higjieno-sanitare të miratuara nga Insituti i Shëndetit Publik, si dhe duke respektuar rregullat e distancimit social dhe sigurisë.
Lojtarët kanë udhëtuar drejt kompleksit stërvitor me makina personale dhe me pak persona brenda. Për momentin është i ndaluar udhëtimi i skuadrës me autobus, kështu që udhëtimi do të vijojë me automjete private. Përpara fillimit të çdo seance stërvitore, stafi mjekësor kryen kontrollin individual për secilin lojtar, ku u matet temperatura. Nga kontrolli i djeshëm të gjithë anëtarët e familjes së kuqe kanë rezultuar të shëndetshëm dhe temperatura e lojtarëve ka qenë normale, me një mesatare 36.5. Pas kontrolleve paraprake nga stafi mjekësor, futbollistët janë vënë nën urdhrat e stafit teknik. Pjesën dërrmuese të ngarkesës në këtë seancë të parë e kanë marrë përgatitjet fizike, kryesisht me vrapime dhe ushtrime të tjera. Por, pas një mungese të gjatë, futbollistët kanë patur mundësi që të ushtrohen edhe me topin, gjë e cila u ka munguar shumë prej dy muajsh. Lojtarët janë këshilluar që t'i zbatojnë në maksimum rregullat dhe protokollin e miratuar, ku duhet të
shmangin sa më shumë kontaktet fizike, që nuk kanë të bëjnë me pjesën aktive në fushë.
Mungon Romero- Të pranishëm në seancën stërvitore kanë qenë të gjithë futbollistët që janë përgatitur edhe para shpërthimit të pandemisë. Ndonëse kanë kaluar 66 ditë nga seanca e fundit stërvitore, te Partizani vijon marrëdhënia e ngrirë me mesfushorin Aristoteles Romero. Venezueliani u spostua nga stafi teknik te Partizani B për shkaqet që dihen, por edhe pse kanë kaluar mbi dy muaj, sërish Romero mbetet larg ekipit të parë. Duket qartë që mesfushorit i është mbyllur përfundimisht dera tek ekipi i parë dhe kontratën me të kuqtë do ta përmbushë te Partizani B.