Duka: Respektoni masat, do të keni udhëzues për rifillimin e kampionatit
Presidenti i FSHF-së, mesazh botës së futbollit në vend
Ministria e Shëndetësisë dha dritën jeshile që të gjitha skuadrat shqiptare të kenë mundësinë të stërviten. Menjëherë të gjitha i janë futur punës, për t'u përgatitur për rifillimin e kampionatit, i cili është planifikuar më 3 qershor për Kategorinë Superiore dhe më 7 qershor për Kategorinë e Parë dhe Kategorinë e Dytë. Dje, nëpërmjet një mesazhi, presidenti i FSHF-së, Armand Duka, ka përshëndetur rifillimin e stërvitjeve.
Mesazhi i plotës i Dukës: "U drejtohem me këtë mesazh, futbollistëve, trajnerëve, drejtuesve dhe stafeve të klubeve, ekipeve dhe akademive të futbollit.
Sot, pas një periudhe relativisht të gjatë ndërprerjeje për shkak të pandemisë, të gjithë do të kenë mundësinë të kthehen në fushat e stërvitjes. Kjo është një ngjarje e shënuar, sepse nis rrugën për rifillimin e sezonit futbollistik të ndërprerë nga masat, për luftën ndaj "COVID-19". Në fillim, dua t'ju falënderoj për durimin dhe qytetarinë e treguar gjatë kësaj periudhe të gjatë dhe të vështirë, duke zbatuar rregullat e distancimit social. Edhe për mesazhet e solidaritetit që keni dhënë nëpërmjet prononcimeve tuaja. Futbolli është një pjesë e rëndësishme dhe e ka për detyrë të japë mesazhe me vlera, për shoqërinë shqiptare. Dua t'ju kujtoj edhe njëherë, që të jeni sa më të kujdesshëm dhe të zbatoni rregullat e distancimit social dhe protokollet në lidhje me zhvillimin e stërvitjeve në këto kushte. Jam i bindur që ju dhe stafet tuaja do të tregoheni të kujdesshëm në këtë drejtim, në mënyrë që gjithçka të shkojë sa më mirë.
Në ditët në vazhdim, Federata Shqiptare e Futbollit do të organizojë disa demonstrime, seminare dhe aktivitete të tjera me klubet, në mënyrë që ato të janë sa më të qarta dhe të lehta për t'u zbatuar nga ana juaj, si organizatorë të ndeshjeve. Në mënyrë që rifillimi i edicionit të ri dhe i të gjitha aktiviteteve futbollistike të na gjejë sa më të përgatitur dhe ç'është më e rëndësishmja, sa më të mbrojtur.
Edhe njëherë stërvitje të mbarë dhe suksese në punën tuaj! Armand Duka President i FSHF", ishte mesazhi i kreut të qeverisë së futbollit në vend.