Shehi: 10 fitore për titullin
“Është ditë e shënuar, më në fund iu kthyem pasionit. Limaj vjen së shpejti”
Orges Shehit i është rikthyer buzëqeshja dhe jo vetëm pasi skuadra nisi stërvitjet, por prej grupit. Që prej ditës që mori drejtimin e Kukësit, kjo është e para herë që e ka skuadrën kaq të plotë dhe ky fakt e motivon në rrugën drejt titullit. Në intervistat e dhëna dje për mediat, trajneri i verilindorëve shpjegoi arsyen pse zgjodhën Elbasanin për t’u grumbulluar dhe njoftoi se brenda pak ditësh pret që të kthehet edhe Vesel Limaj nga Gjermania. Nuk heq dorë nga përmbysja e Tiranës, aq sa hapur e thotë që prej skuadrës së tij pret plot 10 fitore.
Çfarë prisni nga skuadra pas ndalesës që shkaktoi “COVID-19”?
Për ne që merremi me sport është një ditë e shënuar. Pas 2 muajsh e pak kthehemi te pasioni dhe puna jonë. Shyqyr që erdhi kjo ditë dhe besoj se jemi me optimizmin e duhur dhe të plotë për të vazhduar me shumë dëshirë e entuziazëm rrugën drejt objektivave.
Kampionati nis më 3 qershor, edhe pse ende nuk është zyrtarizuar nga qeveria. Është koha e mjaftueshme për t’u përgatitur plotësisht?
Pas kësaj pandemie që shpërtheu, u fut e gjithë bota në pështjellim e jo vetëm ne. Ndoshta mund të kishim pak ditë më shumë, por besoj se është bërë maksimumi nga ana e federatës për të na dhënë disa ditë në dispozicion. Jo gjithçka varej prej tyre, kështu që çdo ditë
do ta shfrytëzojmë maksimalisht.
A mund të themi që Kukësi është në disavatazh nga skuadrat e tjera, pasi disa lojtarë do të vuajnë karantinimin 14-ditor?
E kemi këtë problem, pasi fatkeqësisht janë disa
lojtarë që u larguan në shtëpitë e tyre. Na kanë ardhur pak me vonesë, por nuk kemi çfarë të bëjmë. Duhet të përshtatemi e të marrim maksimumin. E vështirë është sigurisht për t’i sjellë në formën optimale, pasi një grup ka nisur pak më para dhe tjetri është më pas. Do t’ia dalim, me gjithë vështirësitë që kemi.
Meqenëse përmendet Limajn, si është situata me të?
Sikundër edhe dihet, Limaj ka pasaportë gjermane dhe ka pasur vështirësi të mëdha për t’u rikthyer.
Faza përgatitore në Elbasan, pse kjo zgjedhje?
Drejtuesit e klubit i kanë marrë të gjitha masat. Hoteli ku do qëndrojmë do të jetë vetëm për ne dhe janë kushte shumë të mira. Ne u munduam të bëjmë më të mirën e mundshme dhe të jemi të gjithë të grumbulluar gjatë gjithë kësaj kohe. Lojtarët kanë qenë shumë korrektë për sa i përket regjimit, janë paraqitur me peshë shumë të mirë.
9 pikë pas kryesuesve, sa e vështirë për të tentuar vendin e parë?
Kryesore është që ne jemi të plotë, përveç Limajt. Edhe atë e presim të na bashkohet këto ditë. Kjo më gëzon, pasi nën drejtimin tim nuk e kam pasur kurrë grupin kaq të plotë. Ndaj, mendoj se është një moment i mirë për ne, ndaj objektivi ynë është që të marrim maksimumin e pikëve. Le t’i fitojmë që të gjitha ndeshjet, pa na interesuar se çfarë bëjnë rivalët tanë. Motivimi nuk na mungon, te çunat shikoj entuziazmin e duhur për të tentuar objektiva të mëdhenj.