Daja: Rigjeta një ekip entuziast, ja pse s’krahasohemi me të tjerët
Skënderbeu filloi dje zyrtarisht përgatitjet për të qenë gati deri diku për pjesën e mbetur të sezonit. Lojtarët bardhekuq, sipas udhëzimeve nga klubi, kanë qenë dje pasdite të pranishëm në “Tropikal Resort” për t’u bërë pjesë e programit stërvitor. Menjëherë gjithçka ka filluar nga përgatitja në fushë, atje ku bardhekuqtë duket se mezi prisnin rikthimin. Pas seancës së parë, ku fillimisht pati një kontroll të lojtarëve, trajneri Ilir Daja ka shpjeguar në një intervistë për “Panorama Sport” se në çfarë gjendjeje i gjeti futbollistët. Lajm i mirë është fakti se asnjë prej tyre nuk kishte shtuar në peshë, por ka diçka tjetër që e shqetëson trajnerin. Ai e sqaron këtë në prononcimin për gazetën menjëherë pas përfundimit të seancës së parë, ku grupi i lojtarëve ishte thuajse i plotë. Zoti Daja, pas një shkëputjeje mbi dymujore, si i keni parë lojtarët në seancën e parë stërvitore? Siç e thatë edhe ju, ishte një shkëputje dymujore dhe me një stërvitje individuale të limituar, si pasojë e situatës, e cila na çoi tek kjo ndërprerje. Gjendja e lojtarëve ka qenë e ndryshme. Diçka e tillë është normale dhe varet më së shumti nga karakteri i lojtarëve dhe vendi ku jetojnë në raport me masat shtrënguese për parandalimin e virusit. Normalisht që në seancën e parë është e vështirë që të shohim vërtet gjendjen reale të tyre, pasi në këto raste entuziazmi i rikthimit fsheh detaje të komponentëve fizikë. Por, më duhet të them se kishte diferenca mes futbollistëve. Të mërkurën do të testojmë gjendjen për të parë realisht se ku jemi pas kësaj pauze të gjatë.
Jeni brenda pritshmërive apo keni parë një gjendje jo të mirë?
Të them të drejtën në kushte karantine nuk e bën dot parashikimin të saktë, pasi janë shumë detaje që ndikojnë në respektimin e programit të dhënë nga stafi për lojtarët. Me kushtet që kanë pasur, them që ishin kënaqshëm fizikisht me aq mundësi sa kishin për të bërë stërvitje individuale. Natyrisht krahasimin gjithmonë e bëjmë me veten.
Nuk krahasohemi me të tjerët, sepse nuk e kanë ndërprerë asnjëherë stërvitjen, pavarësisht masave të marra.
A ka pasur lojtarë të Skënderbeut që kanë shtuar në peshë?
Jo, të them të drejtën nuk kemi vënë re diçka të tillë. Megjithëse nuk e dimë se sa për qind e peshës është masë muskulore dhe sa masa dhjamore. Janë vështirë për t’u identifikuar, pasi vetëm analizat laboratorike e tregojnë një gjë të tillë.