Inter, Konte ka 4 “aktorë” për mesfushën
Sensi e Barela partnerët më të mirë, tani është shtuar Eriksen
Tani ka kaluar vërtet aq shuma kohë që ndeshjet më të paharrueshme rrezikojnë, pikërisht, të harrohen. Interi, gjatë fazës së fundit të sezonit, përpara ndalesës, ka regjistruar disa që nuk do të mbeten në memorie. Mes emergjencës së dëmtimeve, angazhimeve të afruara dhe kohës së paktë për të studiuar zgjidhje të reja loja e zikaltërve ka pësuar disa hapa prapa. Justifikimet nuk mungonin, shpjegimet “bazë” ishin kryesisht dy. Së pari: së bashku me lodhjen pakësoheshin edhe xhirot e motorit, duke shndërruar një skuadër të mësuar duke ecur me njëqind në orë më pak të rrezikshme (ose më “normale”, për ta thënë si Konte). Së dyti: dëmtimet, fillimisht të Sensit e më pas të Barelës, i kishin ndërlikuar planet e trajnerit.
INTERI MË I MIRË – Antonio Konte gjatë këtyre muajve karantine në shtëpi ka pasur mënyrë të rishikojë çdo minutë të luajtur nga të tijtë: syri i tij do të ketë kapur me siguri detaje të tjera, por është e pamohueshme që edicionet më të mira të Interit të tij kanë qenë ato kur xhironin me njëqind në orë jo vetëm Brozoviç, por edhe dy italianët e shkurtër, totalisht në gjendje të luajnë njëkohësisht. Sensi kryente punën e “regjisorit” të shtuar, bënte më pak të parashikueshëm frontin e aksionit dhe, duke u pozicionuar në vertikale përpara kroatit, ofronte një
zgjidhje të menjëhershme për të lidhur mesfushën me sulmuesit. Ndërsa te Barela trajneri ka gjetur një inkursor jo tipik, por efikas, i aftë të kryejë më së miri të dyja fazat e lojës.
TRIPLOREGJI – Tani, kur stërvitjet do të kalojnë
nga individualet tek ato kolektivet, do të rinisë gjithçka nga kjo trio. Këto javë të para pune mbi rezistencën dhe shpejtësinë duhet të kenë dhënë përgjigjet e para, rikuperimin e një forme fizike që do t’i lejojë skuadrës të veprojë në fushë me një ritëm të rrezikshëm.
Më pas do të kalohet në një fazë të re, rikuperimin e sigurive të lojës. Duhet kujtuar edhe një faktor i rëndësishëm: merkatoja e janarit afroi edhe Kristian Eriksenin. Me danezin Konte do të ketë një “triploregji” Brozoviç-Sensi-Eriksen, manovër
që duket e pamundur në skemën 3-5-2. Megjithatë, përpara një rrotacioni të detyrueshëm në periudhën që pritet të nisë, trajneri do të ketë mundësi të bazohet gjithmonë te dy “ndërtues” në fushë. Loja e Interit kalon me siguri nga këta të katërt.