Lautaro, Barcelona e do për 10 vitet e ardhshme
Barcelona e ka gjithçka të qartë. Treni "Lautaro Martinez" kalon në këto momente dhe duhet kapur menjëherë, pavarësisht faktit se edhe për një vit tjetër do t'i besohet sërish Luis Suarezit. Sulmuesi argjentnas i Interit konsiderohet si një blerje strategjike për dekadën e ardhshme dhe do të konsiderohet si një nga shtyllat kryesore të Barcelonës, e cila me kalimin e kohës duhet të rinovohet. Çmimi i tij në këtë merkato është 111 milionë euro, por Barcelona nuk ka ndërmend ta paguajë këtë vlerë. Dëshiron që të përfshijë lojtarë që i pëlqejnë Interit për të ulur çmimin. Stafi teknik dhe drejtuesit mendojnë se Lautaro duhet transferuar tani, sepse ndoshta Interi mund t'i vendosë një klauzolë më të lartë dhe ai do të bëhet i paarritshëm si Mbape apo Herri Kejn. Katalanasit i kanë të qartë futbollistët e të ardhmes dhe ata janë portieri Ter Shtegen, Frenki De Jong dhe Lautaro Martinez. Këta të tre do të përbëjnë themelet e Barcelonës së ardhshme dhe për këtë fakt katalanasit do të bëjnë një sforco ekonomike për argjentinasin. Luis Suarez është drejt fundit të karrierës së tij në nivelet e larta dhe Lautaro do të marrë fanellën me numër 9 për ta mbajtur atë në vitet e ardhshme në ekipin katalanas. Kjo do të thotë se Barcelona ka braktisur Nejmarin dhe i ka përqendruar të gjitha forcat te lojtari i Interit. Nuk do të jetë aspak e lehtë, sepse oferta e Barcelonës me kërkesën e Interit kanë shumë diferenca
dhe palët po punojnë për të gjetur gjuhën e përbashkët. Antonio Kontes nuk i pëlqejnë lojtarët që ofron Barcelona dhe zikaltrit kërkojnë që klubi të paguajë klauzolën. Nuk dihet ende se si do të rrjedhin ngjarjet, por e sigurt është që bisedimet mes palëve kanë
qenë të shumta dhe Barcelona shpreson që të arrijë sa më shpejt një përgjigje nga Interi, i cili po punon për të gjetur zëvendësuesin. Dris Mertens u zbeh si çështje sepse ka pranuar të rinovojë me Napolin, ndërsa emrat e tjerë janë Verner, Obamejang dhe Kavani.