Ndahet nga jeta ish-trajneri i Interit, Manaj e De Biazi me një mesazh special
Data e djeshme, 22 maji, nuk ka mundur të jetë plotësisht festive për Interin. Në “ditëlindjen” e “Tripletës”, ka ndërruar jetë një nga personazhet më të shquara të futbollit italian dhe atij interist: Luixhi Simoni është ndarë nga jeta në moshën 81-vjeçare, pas disa muajsh i shtruar në spital për shkak të një problemi në tru, të pësuar vitin e kaluar. Simoni është ish-lojtar, trajner dhe president.
MESAZHET - Me Interin ai arriti të fitonte edhe një Kupë UEFA në vitin 1998. Deri në vitin 2015 ai ishte presidenti i Kremonezes, ku pjesë të skuadrës kishte edhe Rei Manajn, të cilin më pas ia shiti Interit dhe që sot luan te Barcelona. Shqiptari ka shprehur hidhërimin e tij në rrjetet sociale: “I dashur president, sot është një ditë shumë e errët për të gjithë dashamirësit e tu. Dua të të falënderoj për gjithçka ke bërë për mua.
Gjithmonë më prite si djalin tënd dhe provove të më ndihmoje. Jam krenar që kisha një udhërrëfyes si ti, i respektueshëm, inteligjent. Tani nuk mund të gjej fjalët e duhura, më fal president. Faleminderit dhe faleminderit përsëri”, shkruante Rei. Një tjetër figurë e shquar e futbollit tonë dhe atij italian, Xhani De Biazi, ka treguar ndjenjat e tij të errëta pas ndarjes nga jeta të ish-trajnerit të tij: “I dashur Xhixhi, ke qenë dhe do të jesh gjithmonë një person i veçantë, për mua dhe për shumë djem që në Bresha me ty janë bërë ‘burra’, ashtu siç të pëlqente të na përcaktosh ne djemve me kokën mbi supet e tyre. Faleminderit që na udhëzove në Serinë A, për të besuar te ne edhe në kohë vështirësie. Ende sot i ruaj si thesar mësimet e tua të çmuara, për ndihmën që më dhe për të përdorur cilësitë e mia. U prefsh në paqe”, komentonte ishtrajneri i Kombëtares.