Seria A rinis më 20 qershor, më 17 finalja e Kupës
Miratohet edhe protokolli, karantina do vazhdojë 14 ditë
Më në fund! Serie A vendos të rin isë! Pas më pak se një orë takim mes qeverisë dhe drejtuesve të futbollit, ministri i Sportit, Vinçenco Spadafora, iu drejtua zyrës së kryeministrit Xhuzepe Konte për të vulosur datën e re të nisjes së kampionatit. Dhe u vendos 20 qershori. Me dekret, aktivitetet sportive nuk mund të rinisnin përpara 14 qershorit, por duke parë frymën pozitive në takimin me federatën dhe ligat italiane, edhe kryeministri vendosi të bëjë një lëshim për futbollin. Videokonferenca nisi në orën 18:30 dhe protagonist kishte ministrin Spadafora, Federatën, Ligat si dhe përfaqësuesit e shoqatave të futbollistëve, trajnerëve dhe arbitrave. “Takimi ishte shumë i dobishëm. Tani Italia po rinis jetën normale dhe është e drejtë të ndodhte kështu. Sot erdhi edhe OK-i i Komitetit Shëndetësor për protokollin e Federatës Italiane të Futbollit. Tani mund ta konfirmoj se kampionati do të rinisë më 20 qershor”, konfirmoi ministri i Sporteve, i cili pas takimit direkt me kryeministrin Konte dekretoi edhe datat e ndeshjeve të Kupës së Italisë, të cilat do të paraprinë 20 qershorin.
KUPA MË 13, 14 E 17 Madje, përpara se Seria A të ngrejë siparin, do të jetë Kupa e Italisë që do të risjellë spektaklin e futbollit italian. Dje është vendosur se në datat 13 dhe 14 qershor (pa u përcaktuar cili çift) do të luhen dy gjysmëfinalet e kthimit të turneut, Juventus-Milan dhe Napoli-Inter, ndërsa fituesja e këtyre dy ndeshjeve do të luftojë për trofeun më 17 qershor, në stadiumin “Olimpiko” të Romës.
OK PROTOKOLLI Protokolli i ri shëndetësor në lidhje me rinisjen e aktivitetit sportiv mori miratimin e Komitetit TeknikoShkencor, duke vendosur edhe për problemet e karantinës “automatike” të skuadrës në rast se do të ketë raste pozitive dhe ajo do të mbetet e pandryshuar, pra 14 ditë dhe jo 7 siç ishte kërkuar të ndryshohej. KALENDARI
Tani pritet të përcaktohet situata në lidhje me transmetimin televiziv të ndeshjeve që do të luhen pa tifozë. Lojtarët kërkojnë anulimin e ndeshjeve të orarit të fashës së parë, atyre të pasditeve të shtyhen përtej orës 18:00, edhe pse mund të bihet dakord për në 17:30. Madje, fasha orare e re deri në fund të këtij sezoni të kampionatit italian mund të jetë shpërndarja e ndeshjeve në oraret 17:30, 19:15 dhe 21:30, për shkak të të nxehtit. Por dje nuk u fol vetëm për Serinë A, por pritet të rinisin edhe kategoritë e tjera, si Seria B për shembull, data e rifillimit të së cilës do të jetë 26 qershori, ndërkohë që nuk ka ende një datë për Serinë C dhe Seria A të femrave.