1 vit në komandën e Kontes, si ka ndryshuar Interi
Pas 365 ditësh skuadra e tij ka marrë formë, ja programet për 12 muajt e ardhshëm
Më në fund, rin isim”. Videoja e prezantimit të Antonio Kontes tek Interi niste me këto fjalë të tijat, të mbetura aktuale thuajse një vit më pas. Ishte 31 maji, trajneri kishte zbarkuar në Milano tri ditë më parë, saktësisht një vit nga dje. Zbarkoi në mënyrë sekrete, por “martesa” me zikaltrit po konsiderohej prej kohësh: trajneri u kap “mat” nga paparacët me stafin social interist një ditë më pas (si sot një vit përpara). Kishte nisur punën, akoma pa firmosur. Ndër të tjera, në periudhën para Koronavirusit, e gjithë eksperienca e tij zikaltër ka qenë plot tension, hiperaktive, intensive. Kështu ka kaluar 12 muajt e parë, ndërkohë që përgatitet për “mandatin” e dytë. Çfarë Interi ka parashikuar?
NËN PRESION – Konte, përpara se t’i vendoste nën presion futbollistët, nisi të vendoste në vijë bashkëpunëtorët, stafin dhe drejtuesit. Duhej kolauduar makina organizative (duke nisur nga grumbullimi në Lugano) dhe, me Marotën dhe Auzilion, të përcaktoheshin bazat e një grupi që duhet t’i shkëpuste lidhjet me të kaluarën. Telefonat nisën të nxeheshin nga përdorimi e nuk do të ftoheshin deri përpara janarit: fillimisht zgjidhja e çështjes së “rebelëve”, më pas ndjekja e Lukakut dhe tensionet e para për një turne të përballuar thuajse pa sulmues. Duheshin përcjellë te lojtarët edhe parimet e skemës së re 3-5-2 dhe të mendimit si “ne”, fitimi i zemrave të tifozëve rezultoi më i thjeshtë nga se parashikohej (i kompletuar në derbi), presingu i ushtruar te drejtuesit për të zgjeruar dhe përmirësuar skuadrën ka goditur si “çekiç” për tetë muaj. Emergjenca e dëmtimeve e ndërlikoi situatën, por edhe i ka vendosur të gjithë në punë në një grup ku, nga Espozito te Borha Valero, të gjithë janë përfshirë. Lautaro me Konten shpërtheu, trajneri po shijon edhe Lukakun (bast i stërfituar) dhe mori nga merkatoja e janarit disa përforcime, pavarësisht se jo të preferuarin Vidal. U afrua Eriksen, në një moment për danezin megjithatë të papërshtatshëm për ta gjetur veten në modulet e reja. Humbjet me Lacion dhe Juventusin e largojnë nga kreu Konten, duke bërë më të pamundur arritjen e titullit “si zakonisht” në vitin e tij të parë. Bota (dhe futbolli, normalisht) do të ndalet papritur: Interi largohet nga “Appiano” dhe nis stërvitjet në shtëpi; do të vazhdojë kështu për rreth dy muaj, më pas vijnë tamponët dhe vazhduan stërvitjet fillimisht individuale e tani ato në grup. Viti i parë interist i Kontes pritet të mbyllet në fushë, në pritje që të rinisë gjithçka.
E NESËRMJA – Një pjesë e Interit të së ardhmes është ende brenda një sezoni “të çmendur”, të parit të Kontes, që duhet të rinisë. Dhe, që shikon trajnerin larg nga mundësia (jo ideja, sepse “çmenduria” gjithmonë mbetet tek Interi dhe te një si Konte) për të luftuar ende për titullin. Nuk do të thotë të dorëzohesh, sigurisht, edhe pse duke fituar ndeshjen e prapambetur me Sampdorian do të mbeteshin vetëm gjashtë pikë për t’u rikuperuar nga Juventusi. Megjithatë, arsyetimi ndoshta i imponon Interit të shohë te dy kupat, trofetë, për të vendosur në radhë të parë. “Të fitojmë diçka” mbetet objektivi i klubit. Kthimi me Napolin në Kupën e Italisë, Getafe në Ligën e Europës: jepini një kalendar Kontes, shikoni që ato data do t’i rrethojë me të kuqe. Megjithatë, pas këtij sezoni do të shikohet vërtet versioni 2 i Interit të Kontes, që kalon nga një merkato, ajo e kësaj vere, të cilën trajneri do të dojë ta planifikojë në çdo detaj me klubin. Tani Konte ka një avantazh: e njeh në perfeksion organikën, pikat në favor dhe defektet i ka nënvizuar mirë. E di se si dhe ku duhet ta përforcojë Interin, nuk do t’i lërë asgjë rastësisë (prandaj edhe po kërkon kampionë gati, si Vidal apo Kavani) sepse sezoni i ardhshëm duhet të jetë ai i sulmit përfundimtar ndaj Juventusit. Këtu qëndron pika kryesore: Konte nuk iu bashkua Interit për të bërë kalimtarin. Nuk është e konsiderueshme t’ia besosh një projekt që nuk parashikon në program objektivin titull. Një titull me ngjyrat zikaltër do të përfaqësonte për të mbylljen e një rrethi, një medalje në kraharor për t’u vendosur dhe për të shndritur kurrikulumin e klubit. Rritja do të jetë normalisht me hapa të mëdhenj. Dhe kalon edhe nga një skuadër, e ardhshmja, që duhet të jetë më e kompletuar në reparte (gjashtë përforcime të shënuara në listë), por edhe në gjendje të ndryshojë fytyrë nga pikëpamja taktike kur të jetë e mundshme. Konte është si mësuesi që fillimisht të mëson metodën, por më pas nuk dëshiron të karikojë nxënësit e tij me shumë teori. Kjo i përket këtij sezoni. I radhës do të jetë një tjetër histori. Dhe trajneri dëshiron që të jetë një histori fituese në nivelin maksimal: jo më një mrekulli që duhet përmbushur, Konte kërkon një objektiv për të shënuar.