Halili i bindur, titulli kalon nga Ballshi

Kundër Bylisit dhe Luftëtarit shihen si ndeshje vendimtare

Refik Halili është i bindur se fitorja në Ballsh dhe në Gjirokastër mbyll përfundimisht çështjen e titullit. Numri një i bardheluve një gjë të tillë ua ka transmetuar lojtarëve në takime individuale, ashtu si edhe trajnerëve të skuadrës. Sipas Halilit, një fitore me Bylisin dhe një tjetër me Luftëtarin, kombinuar me një fitore të Partizanit kundër Kukësit, me të gjitha gjasat do ta mbyllte çështjen titull dhe për të gjithë bardheblutë do të mbetej vetëm matematika në lojë. Në fakt, Halili në çdo bisedim që ka bërë me skuadrën ka kërkuar përqendrim në këto dy sfida. "Janë ndeshjet më të rëndësishme të sezonit. Këtu mbyllim gjithçka, sepse më pas nuk ka më histori. Luajmë në shtëpi me Flamurtarin, Vllazninë, Bylisin", mësohet t'u ketë thënë Halili disa lojtarëve titullarë. Në fakt, llogaritë janë të thjeshta. Tirana është e bindur që ia del të fitojë titullin, nëse nuk mundet në Ballsh, edhe pse është e sigurt në krye të renditjes. Me nëntë pikë avantazh nga vendi i dytë, Tirana ka luksin të vrasë kampionatin dhe të mos ia lërë në dorë fatit historinë e titullit, por ta fitojë në fushë. Një arritje matematikore e titullit do të thotë luks për Egbonë, që mund të eksperimentojë skema të reja në formacionin bardheblu.

Titulli festohet me tifozë -

Te Tirana janë të bindur se, paçka asaj që do të ndodhë në javët në vazhdim, bardheblutë titullin do ta festojnë me tifozë. Në fakt, gjithçka po llogaritet që Tirana sfidën e fundit të kampionatit me Bylisin në javën e 36-të ta luajë me tifozë. Bardheblutë kanë më shumë se 10 vite që nuk fitojnë titullin kampion dhe pas të kuqve, ata do të jenë skuadra tjetër e kryeqytetit që do të prekë trofeun. Për ata që nuk e dinë, Tirana është skuadra më e titulluar në Shqipëri, me 52 trofe, 24 kampionate, 16 kupa, 11 Superkupa dhe një herë fituese e Kategorisë së Parë.