Muça: Kurrë te Partizani, ndaj Bylisit luajmë sezonin
Mbrojtësi i Tiranës, Gentian Muça, po kalon një rini të dytë te bardheblutë. 33-vjeçari është shumë pranë fitimit të titullit të dytë kampion në karrierën e tij, pas atij me Dinamon. Në një prononcim për emisionin "Fan Zone", Muça ia mbylli derën përfundimisht një transferimi te Partizani teksa u shpreh se është e pamundur të vishet i kuq. "Nuk ka rrogë që më blen për të shkuar te Partizani. Këtë e them pa mendjemadhësi. Ka gjasa që nuk do të ndodhë kurrë. Në këtë periudhë të karrierës që jemi, nuk është e këshillueshme të lëvizësh shumë. Te Bylisi dhe Dinamo kam qenë i huazuar nga Tirana. Shkalla e vështirësisë për të ecur në Europë është pak më e madhe. Gjithsesi, me pak fat mund të ecim përpara. Duhet kujdes maksimal për të shmangur dëmtimet. Kundërshtari mundohet të na vërë në gjumë për të na thënë se kampionati është mbyllur, por ai është hapur më shumë se kurrë. Tani asgjë nuk është e sigurt. Rinisja e kampionatit mund të sjellë shumë probleme që kanë hasur skuadra të mëdha të Europës", është shprehur Muça. Rëndësia e ndeshjes së parë - "Kjo ndeshje do vlejë për 90% të kampionatit për ta mbyllur. Përveçse luajmë me një kundërshtar të fortë, ka të bëjë edhe me çështjen e motivimit. Me këtë ndeshje mund të vrasim kampionatin. Distancimi social na ka çoroditur të gjithëve. Sportistët rrinë më shumë me njëri-tjetrin se me familjen. I bie të distancohesh nga familja dhe jo nga shokët e skuadrës. Kalendarin e bën të vështirë ose të lehtë skuadra. Nuk ka kundërshtarë të lehtë ose të vështirë. Nuk ka eufori apo nënvlerësim. Sikur edhe ta kishim fituar kampionatin, kemi një tjetër trofe, Kupën si dhe përfaqësimin dinjitoz në Kupat e Europës. Duhet të jemi të motivuar në maksimum. Trajneri Egbo thjesht të na kujtojë ndeshjen ndaj Partizanit dhe karikimi është maksimal", mbylli Gent Muça.