Një mesfushor me këmbë fantazisti, ja kush është Dejan Kulusevski
Dejan Kulusevski është afrimi i parë i Juventusit për sezonin 2020'21. Atalanta, si pronare e kartonit, ka përfituar 35 milionë euro teksa edhe 9 milionë euro të tjera mund t'i marrë në formë bonusesh. 20-vjeçari ka luajtur si i huazuar te Parma, por paraqitjet e tij i kanë habitur të gjithë. I aftë të luajë në çdo pozicion të mesit të fushës, suedezi do të jenë maratonomaku cilësor i "Zonjës së Vjetër". Ideja aktuale është një rol në krahun e djathtë, por cilido qoftë vendimi i Sarrit, djaloshi me rrënjë maqedonase duket gati për hapin e madh në karrierë.
ROLI - Ideale për Kulusevskin do të ishte një pozicion pas sulmuesit ose sulmuesve, por pikënisja duhet të jetë nga korsia e majtë. Në dy sezonet e fundit diçka e ngjashme i është kërkuar Duglas Kostës. Problemet e shumta fizike i kanë kushtëzuar brazilianit paraqitjet e kjo i detyroi bardhezinjtë që të investojnë te Kulusevski. Te Parma e D'Aversës ka treguar se di të përshtatet, por edhe të "nuhasë" nevojat e ekipit në momente të ndryshme të ndeshjeve. Nëse Sarri i kërkon të zgjedhë rolin, Dejani do të preferonte të ishte fantazist. Kjo nuk përbën problem sepse Juvja një pjesë të sezonit ka luajtur me skemën 4-3-1-2, e cila më pas u zëvendësua me 4-3-3-shin.
KOHËT - Në futboll nuk ka asnjë siguri, por në siguritë aktuale është ajo që Kulusevski nuk mund të luajë për bardhezinjtë deri në shtator, gjithmonë pasi të kemi përjetuar ato që do të ndodhin në korrik dhe gusht. Rrugët për djaloshin me pasaportë suedeze janë dy dhe e para është që të bashkohet me Juven që në korrik. Mundësia e dytë është ajo që të qëndrojë me Parmën deri kur të konsumohet kalendari 2019-'20, çka është edhe më e mundshme duke parë raportet mes klubeve. Problem, edhe pse jo parësor, është paga e 20-vjeçarit. Kush do ta paguajë për qershorin dhe korrikun? Parma pret vendimet e qeverisë dhe federatës, por "Kulu" duket më i interesuar që të paguhet nga "Zonja e Vjetër" ku edhe përfitimi ekonomik do të ishte më i madh. Edhe në këtë rast, rrugëzgjidhjen do ta gjejnë verdheblutë dhe Juvja.
KONTRIBUTI
Me një organikë me moshë mesatare prej 28 vitesh e 202 ditësh si askush tjetër në Serinë A, Juvja ka nevojë për freski. Kulusevski ndërkohë është lojtari i dytë në kampionatin italian për kilometra të përshkuar. 11.822 kilometra çdo 90 minuta janë një kartëvizitë ideale, por 20-vjeçari ofron edhe shumë driblime. Mes lojtarëve nën 21 vjeç që luajnë në Serinë A, Kulusevski është i pari në listën e driblimeve të suksesshme, të cilat nga Sarri shihen si një armë e mirë për të krijuar epërsi numerike. Edhe rastet e krijuara e shohin suedezin protagonist. Vetëm Sandro Tonali krijon më tepër se blerja e re e Juves që sigurisht do të duhet të përshtatet në një ambient ku presioni është shumë herë me i lartë sesa te Parma. Kohë ka ende, ndaj po përfiton për të marrë patentën të cilën ia "hoqi" nga duart ndalesa për shkak të Koronavirusit.
KURIOZITETE - Pas intervistës së publikuar një ditë më parë nga "Panorama Sport", e gjithë bota po mëson të njohë Dejan Kulusevskin. Ne ju ofrojmë pesë kuriozitete, e njëra prej tyre ka lidhje me Juven. Sa u përket preferencave, "Kulu" ka zgjedhur Eden Hazardin si idhullin e tij, me belgun që ishte ndër yjet që i mundësuan Çelsit të Mauricio Sarrit ngadhënjimin në Ligën e Europës vitin e kaluar. Në pritje për t'u afirmuar si kampion, Dejani ka hequr dorë nga çamçakëzi, ëmbëlsira dhe pijet me gaz. Mentori në vitin e shpërthimit në Serinë A, ishte Bruno Alvesh, shok prej vitesh i Kristiano Ronaldos te Portugalia. Pikërisht 40-vjeçari që luan për Parmën ka qenë ndër këshilluesit e suedezit për dietën që një lojtar i nivelit të lartë duhet të ndjekë për të ruajtur trupin dhe formën. Si shumë shokë që do të gjejë te Juventusi, Kulusevski është një ndjekës i pasionuar i basketbollit, sport ku ka idhuj Lonzo Bollin dhe Lebron Xhejmsin, e tashmja dhe e kaluara e Los Anxheles Lejkërs. Edhe në aspektin kulturor, 20-vjeçari duket i mirinformuar. Ai flet rrjedhshëm suedisht, maqedonisht, italisht, anglisht dhe pak gjermanisht. Synimet gjuhësore të radhës duken spanjishtja ose portugalishtja, teksa për holandishten e De Ligtit i parashikojmë më shumë se një vështirësi.