Mateus, elozhe Kimishit: Është një lider absolut
Ish-kapiteni i Bajernit, i mahnitur nga mesfushori
Me fitoren kundër Borusias së Dortmundit, Bajerni hodhi një hap të rëndësishëm drejt titullit kampion. Goli i fitores erdhi nga Zhoshua Kimish, mesfushori bavarez i surprizoi të gjithë me një parabël jashtë zone. Një ekzekutim që la pa fjalë edhe ish-kapitenin e Bajernit dhe kombëtares gjermane, Lotar Mateus. “Kimish punon çdo ditë me veten e tij. E vlerësoj si lojtarë jo vetëm për kualitetin që ka, por edhe përqendrimin që tregon në punën e tij. E kam ndjekur me vëmendje edhe para pandemisë, mënyra se si kryen nxehmje dhe përgatitet për ndeshjen. Një përkushtim maksimal. Ai nuk shpërqendrohet nga asgjë, nuk shikon majtas-djathtas, duke u kushtuar rëndësi vetëm lëvizjeve të tij. Kjo nuk mund të jetë shumë, por mjafton për të zbatuar me përsosmëri detyrat në fushën e lojës”, tha 59-vjeçari. Për Mateusin, nuk ka asnjë dyshim, Kimish është një lider i lindur, edhe pse është vetëm 25 vjeç. “Zhoshua jo vetëm që shënoi një supergol në ndeshjen më të rëndësishme të sezonit, por vrapoi edhe 13.7 kilometra. Një shifër rekord në sezonin aktual. Mbi 100 prekje të topit, çfarë doni më shumë? Ai gjendet kudo, në mbrojtje, në sulm dhe në mesin e fushës, agresiv dhe inteligjent, nuk humbet topin kollaj. Këto janë cilësitë e një lojtari të madh që është ndryshe nga pjesa tjetër e skuadrës”. Analisti i “Sky”-it nuk kurseu edhe mbrojtësin austriak, David Alaban, të cilin e vlerësoi për mënyrën se si ka luajtur si qendërmbrojtës. “Ishte një rol i ri për të, por David ka sjellë ekuilibër në lojën mbrojtje. Mungesa e Zyles dhe Hernandezit nuk është ndier pothuajse fare. Edhe ai, si Kimish, ka treguar një profesionalizëm në detyrat e dhëna nga Fliku. Ky i fundit ka një meritë të veçantë pasi ka ditur të marrë 100% nga lojtarët e tij. Skuadra po funksionon si një trup i vetëm”, përfundoi Mateus.