Ibra, fjalë lamtumire: Hamarbi, shihemi në fushë PAOLO SKARONI
Milani shpreson ende, Fiorentina e Bolonja në... pritje
Nuk është hera e parë e nuk do të jetë as e fundit. Zlatan Ibrahimoviç u beson mendimet e tij rrjeteve sociale duke turbulluar ujërat rreth Milanit, që për hir të së vërtetës janë të turbulluara mjaftueshëm edhe pa kontributin e tij. Nuk është mister që suedezi adhuron të luajë me fjalët, por kohët e fundit formulat e tij kanë krijuar pikëpyetje jashtëzakonisht të mëdha. Postimi i fundit i 38-vjeçarit u hodh dje në rrjetin “Twitter” dhe kishte lidhje me rikthimin në fushë të Hamarbit (Shihemi në fushë). Në fakt, fjalët e Zlatanit ishin një urim për klubin ku është aksioner, pasi edhe Suedia këtë fundjavë u hap për sa i përket futbollit profesionist.
HIPOTEZA – Sado që bëhej fjalë për një urim normal, çdo klub që ka interes për të ardhmen e Ibrës ngriti antenat. I pari në listë është pikërisht Hamarbi që pasi e pati sulmuesin në stërvitje për disa javë, po mundohet ta bindë që të jetë pjesë e rregullt e skuadrës në sezonin e ri. Vërtet është ende në fazën e hipotezës, por kjo mbështetet në idenë e 38-vjeçarit për t’i dhënë fund karrierës në atdhe. Duke qenë aksioner, ai do të ndihmonte klubin e tij të kufizonte dëmet duke qenë se në Suedi parashikohet që ndeshjet të luhen pa tifozë të pakën deri në një vendim të dytë që nuk besohet se do të vijë së shpejti.
MUNDËSITË – Milani pret shërimin e Ibrës (i dëmtuar në pulpë), për të diskutuar një bashkëpunim të mundshëm për një tjetër sezon. Suedezi nga ana e tij kërkon të njohë planet e klubit e sidomos ato të lidhura me rëndësinë që do t’i jepet. 4 milionë eurot e ofertës mund të mjaftojnë, nëse për fanellën me numër 21 premtohet një sezon prej protagonisti. Pistat e tjera, disi më të ftohta, janë ato që e çojnë 38-vjeçarin në Bolonjë ose Firence. Te kuqeblutë e pret miku Mihajloviç
dhe disa kufizime në rrogë, ndërsa te Fiorentina janë gati t’i garantojnë 5 milionë euro në vit dhe një vend titullari në krah të Frenk Riberisë. Siç shihet, mundësitë nuk i mungojnë. Ibrës i mbetet vetëm të zgjedhë.