MSG-ja në krizë, Mesi ka nevojë për shpërthimin e Suarez-Grizman
Misioni Champions, uruguaiani duhet të thyejë mallkimin
Nëse Barcelona pretendon të jetë favorite serioze në Ligën e Kampionëve, duhet që të rimëkëmbë treshen e sulmit dhe ta bëjë atë të funksionojë si një lojtar i vetëm. Duhet që tri yjet që përbëjnë këtë repart të kuptohen, të kërkojnë njëri-tjetrin, të jenë efektivë. Ky ka qenë një problem për skuadrën e Setienit në këtë sezon. Ky i fundit vendosi që të ndryshonte skemën për të luajtur me 4-4-2 romb dhe Mesi në mbështetje të Suarezit dhe Grizmanit. Diçka e tillë funksionoi kundër Vijarealit, por nëse nuk funksionon në këtë mënyrë edhe për sfidat e Europës, atëherë titulli është praktikisht i pamundur. Problemi është që Mesi, pavarësisht se doli golashënuesi më i mirë i sezonit, ka shënuar shumë pak gola. Kjo gjë sjell më pak gola te Barcelona sesa në sezonet e kaluara. Pavarësisht se katalanasit shënuan 86 dhe kishin sulmin më të mirë, kjo nuk mjaftoi për të sjellë trofeun. Luis Suarez qëndroi shumë kohë jashtë fushës së lojës dhe nuk kishte kushtet e duhura fizike. Tani është rikthyer në formë, por ende jo në 100%. Barcelona ka nevojë për të për të fituar Champions-in. Luisito ka "firmosur" sezonin më të dobët që nga koha kur është sulmues i Barcelonës me 19 gola. Edhe Antuan Grizman nuk ka qenë më mirë. Francezi ka pasur probleme të shumta për t'u përshtatur me katalanasit dhe në vitin e tij të parë ka shënuar 15 gola dhe ka dhënë 4 asiste. Në total MSG-ja ka shënuar 64 gola dhe ka dhënë 42 asiste. Si të mos mjaftojnë statistikat negative për repartin e avancuar, Luis Suarez ka një tjetër "makth" që duhet ta prishë. Uruguaiani nuk ka shënuar në transfertën e Champions-it prej 5 vitesh dhe ky ka qenë një nga problemet e mëdha të Barcelonës në dështimet e njëpasnjëshme në Europë. Për të triumfuar aty është nevoja e të gjithëve. Leo Mesi dëshiron që të ketë mbështetjen e Suarezit dhe Grizmanit për të shmangur një tjetër sezon të dështuar në Europë. Gjithçka do të fillojë me ndeshjen kundër Napolit, e vlefshme për fazën e 1/8ave të Ligës së Kampionëve. E para ka përfunduar 1-1 në Itali dhe katalanasit i druhen formës së mirë që po kalon skuadra e Gatuzos