Superiorja për “Guiness”, 10 trajnerë me valixhe në duar
Rekorde dhe objektiva të arritur, por asnjë i konfirmuar
Kategoria Superiore ka edhe një ndeshje për të mbyllur siparin e një edicioni të veçantë për gjithçka ndodhi këtë vit në të gjithë botën. Mirëpo, referuar planeve për të ardhmen, në asnjë skuadër nuk e thua dot me siguri që plani do të vijojë me trajnerin aktual. Kjo për faktin se të dhjetë trajnerët janë pyetur publikisht nëse do të rinovojnë, dhe asnjë nuk e ka pranuar që të ketë marrëveshje edhe për vitin tjetër.
TRAJNERËT ME VALIXHE NË DUAR
Është e kuptueshme që në elitën e futbollit shqiptar, skuadrat mund të kërkojnë gjithnjë e më mirë. Kjo edhe kur vjen puna për trajnerin që do t'i besohet projekti për sezonin e ardhshëm, por a është normale që asnjë prej tyre të mos jetë konfirmuar? Për të analizuar, gazeta po sjell situatën e secilit prej trajnerëve që janë aktualisht në drejtim. Emanuel Egbo i jep titullin e munguar prej 11 vitesh Tiranës, siguron finalen e Kupës dhe ende nuk e pranon nëse do të jetë apo jo në vazhdimësi. Orges Shehi e gjeti dhe po e mbyll me ekipin në vend të dytë. Nuk e ka ndërtuar ai skuadrën dhe do të jetë pjesëmarrës në Europa Ligë. Sërish i pakonfirmuar. Armando Cungu ka arritur një rekord me Laçin, pasi si asnjëherë më parë kurbinasit po e përfundojnë të tretët. Nuk përjashtohet mundësia e qëndrimit, por publikisht nuk e ka pranuar se ka konfirmimin për më tej. Edi Martini siguroi pjesëmarrjen në Europë me Teutën dhe gjithashtu finalen e Kupës së Shqipërisë. Objektiva të arritur, por ende nuk ka deklaruar konfirmimin prej skuadrës durrsake. Pas largimit të Sormanit,
as Partizani nuk e ka një trajner të deklaruar për sezonin e ardhshëm. Vetë Kalari që po e drejton në këto ndeshje të fundit, ka pranuar se e konsideron veten një lloj "nxënësi të ri sa i përket drejtimit të ekipeve". Ilir Daja, qoftë edhe prej situatës në pritje të Skënderbeut, është ende një prej trajnerëve që nuk e di të ardhmen e tij, nëse do të jetë sërish në krye të korçarëve për një tjetër sezon apo do të marrë drejtimin e Partizanit. Veljko Dovedan ka siguruar mbijetesën dhe faktin që Bylis nuk do të luajë në "play out", por nuk e ka deklaruar dhe pranuar që do të ketë vazhdimësi me ballshiotët. Hysen Dedja gjithashtu është i pakonfirmuar dhe nuk është bërë ende me dije nëse do të ketë të ardhme te Vllaznia apo jo. Neritan Novi nuk e di nëse projekti për rikthimin e Luftëtarit në Superiore sa më shpejt, do t'i besohet apo jo atij. Të paktën nga deklaratat e tij publike. Troisi mori një skuadër të falimentuar, po punon me të rinjtë, por askush nuk di të thotë nëse do të vazhdojë projekti me të në krye apo jo.
KLUBET - E nëse ky është niveli i profesionalizmit te të gjitha klubet elitare, atëherë krahas shumë problematikave të shfaqura tek ato gjatë këtij viti në veçanti, por edhe në vitet e fundit në përgjithësi, kjo ëstë një tjetër hallkë shumë e dobët që tregon të punuarit "sot për nesër" dhe pa një plan të qartë, konkret dhe afatgjatë. Është e drejtë e çdo skuadre që të bëjë bilancet në përfundim të ndeshjes së fundit të sezonit, por thuajse e papranueshme që asnjë prej ekipeve elitare në vend nuk e ka të konfirmuar trajnerin dhe planin për sezonin pasardhës.