Kasa i jep zemër Pogradecit: Ia dalim në sfida të tilla
Liqenorët po u japin dorën e fundit përgatitjeve për ndeshjen përcaktuese me Besëlidhjen, që luhet nesër në stadiumin “Elbasan Arena”. Nga të gjithë konsiderohet një takim delikat ky me Besëlidhjen, sepse për sfida të tilla me karakter kualifikues duhet vigjilencë e jashtëzakonshme për të mos u ndëshkuar. Janë ndeshje ku loja kalon në plan të dytë dhe rëndësi ka rezultati, siç pohon për “Panorama Sport” mesfushori Arsen Kasa: “Takime të tilla janë shumë delikate, sepse nuk të japin shansin të rikuperosh jo vetëm më tej, por edhe brenda 90 minutave. Por, me përvojën që ka Pogradeci, më bën të besoj se do ta kalojmë me sukses Besëlidhjen. Shumë prej futbollistëve tanë kanë përjetuar situata të tilla dhe do të dimë ta zgjidhim ndeshjen. Nuk them se kundërshtari nuk ka përvojë, por Pogradeci mendoj se është më i konsoliduar. Ekipi që do të jetë më i qetë në fushë, do të fitojë”, thekson Kasa.
BREZAT - Te liqenorët ka një ndërthurje brezash dhe duket se futbollistët e rinj janë gjithnjë e më shumë duke u evidentuar. Trajneri Abazaj ka aktivizuar në formacion futbollistë të shumtë të moshës 20-23 vjeç, siç është edhe mesfushori Kasa, por ka edhe 17-vjeçarë si Pengu, Muçollari apo të rinj të tjerë si Berberi, Maxhari e Osmanllari që shihen si një forcë më shumë. Në takimin me Besëlidhjen disa prej tyre do të jenë në fushë nga minuta e parë. “Është shumë pozitiv fakti që trajneri guxon, madje edhe në ndeshje të tilla. Mendoj se forca dhe dëshira jonë për fitore do të jenë një ‘armë’ plus, por e përsëris, përvoja është përcaktuese”, shton Kasa sa i takon këtij argumenti.
GJENDJA – Për gjendjen e ekipit, mesfushori shprehet: “Thuajse i gjithë ekipi është gati. Më vjen mirë që Hysenllari është rikuperuar. Na mungon vetëm Liçkollari, i cili është i detyruar të vuajë dënimin prej 4 javësh, megjithatë jemi gati për të dhënë maksimumin, pse jo, edhe diçka më shumë, pasi vetëm kështu do të dalim me fitore”. Te klubi pogradecar shpresuan shumë se me kalimin e gjysmës së dënimit mund të kishte falje për Liçkollarin, por nuk funksionon kështu në këtë fazë. Liçkollari është një mungesë e madhe, por trajneri Abazaj ka alternativa për mesfushën.