“Bekimi” i Ançelotit: Sarri e meriton Juven dhe titullin
Karleto nuk harron Milanin: Konfirmimi i Ibrës, jetik!
"Ishte një titull i merituar, edhe pse kundrejt të kaluarës pati më shumë vështirësi. Fakti që në krye të skuadrës erdhi një trajner me ide shumë të ndryshme nga dy paraardhësit bëri që rruga të mos ishte më aq e thjeshtë. Pati disa amnezi më shumë në fundin e sezonit, por titulli për Juven ishte më se i merituar". Me këto fjalë, Karlo Ançeloti përshëndeti suksesin bardhezi. Ish-trajneri i Juventusit, nëpërmjet "Radio 1" të rrjetit "RAI", vazhdoi duke thurur elozhe si për Sarrin, ashtu sikurse për ish-kampionin e tij në radhët e Realit të Madridit, Kristiano Ronaldo. "Në fund, mendoj se Sarri ka bërë një punë fantastike, sepse duke njohur idetë e tij nuk është e lehtë që të mbërrish në një skuadër që fiton prej shumë vitesh në mënyrën e saj dhe që në sezonin e parë të implementosh idetë e lojës që ai kërkon. Fakti që ai pati kapacitetet që të përshtatet me të kaluarën mund të mjaftojë sivjet, por mendoj se sezonin e ardhshëm idetë e tij do të kuptohen më qartë nga juventinët dhe gjurma e trajnerit do të duket shumë më shumë. Prandaj, nuk jam aspak dakord për ata që thonë se Sarri nuk është një trajner i denjë për Juventusin. Ronaldo? Për Kristianon ishte sezon i zakonshëm, i luajtur me seriozitet, profesionalizëm dhe shumë gola". Në fund, nuk mund të mungonte edhe një mendim për Milanin, me të cilin pushtoi botën për shumë vite. "Konfirmimi i Ibrës te Milani nuk është i drejtë, por i detyrueshëm. Është një kampion i madh dhe pavarësisht moshës, po e konfirmon që është jetik. Në të njëjtën kohë jam i bindur se edhe zgjedhja për konfirmimin e Piolit ishte ajo e duhura. Pasi Stefano mori një skuadër në vështirësi dhe e nxori nga aty ku po notonte duke shprehur një lojë cilësore, me ide të qarta dhe garanci për të ardhmen", deklaroi Ançeloti.