Tirana akord me Ardit Tolin, gjendet edhe zëvendësuesi i Dokës
Kristijan Toshevski dhe ish-mbrojtësi i Shpresave, pranë firmës
Kristijan Toshevski pritet të jetë afrimi i dytë i Tiranës. Bardheblutë synojnë që të jenë sa më konkurrues në Kupat e Europës dhe teksa Champions-i shtrëngon të afrojë, ka nisur prej ditësh puna për afrimet. "Panorama Sport" ka mësuar edhe goditjen e dytë të kryeqytetasve. Bëhet fjalë për një mbrojtës të djathtë, që praktikisht pritet të zëvendësojë Albi Dokën, i cili largohet drejt Kroacisë pas përfundimit të finales së Kupës. Burime të besueshme të gazetës kanë bërë me dije se Tirana ka gjetur një akord në parim me mbrojtësin 26-vjeçar që është pjesë e skuadrës së Vardarit. I lindur në Tetovë, mbrojtësi i gjatë 1.82 m pritet që të vijë sot në vendin tonë për të diskutuar detajet e fundit përpara se të arrihet edhe akordi përfundimtar për të kaluar më pas te kontratat e bashkëpunimit.
ROLI - Tirana po gjen një zëvendësues për të gjithë mbrojtësit. Teksa praktikisht Toshevski pritet të jetë zëvendësues i Albi Dokës në të djathtë, ai ka si specifikë se mund të luajë në të katër pozicionet e prapavijës. Lojtari i dalë nga skuadra e Teteksit, ka luajtur si profesionist me këta të fundit, ekipin e Pelisterit si dhe së fundmi si pjesë e Vardarit. Ai ka qenë pjesë e kombëtares U-21 të Maqedonisë së Veriut dhe ka qenë pjesë e kombëtares A të saj në tetë takime.
TOLI - Ardit Toli është pranë firmës me Tiranën. Ish-mbrojtësi i Kombëtares U-21, i cili ka mbajtur edhe shiritin e kapitenit të Shpresave, mësohet se ka arritur një akord në parim me klubin bardheblu. Lajmin e konfirmojnë edhe mediat greke, të cilat dje raportuan se mbrojtësi që mund të luajë në disa pozicione në repartin e prapavijës është larguar nga Kallamata, pasi ka marrë një ofertë të parefuzueshme nga Tirana. Në sezonin e fundit Toli ka qenë pjesë e ekipit që militon në Kategorinë e Tretë greke. 23-vjeçari është rritur në akademinë e Olimpiakosit, madje ka qenë kapiten në të gjitha grupmoshat. Nuk është hera e parë që ai përflitet se mund të vishet bardheblu, pasi lojtari i është propozuar Tiranës edhe kur kjo e fundit drejtohej nga Ardian Mema, por në vitin e kaluar u hezitua për një marrëveshje.