Elkan zbulon planet e Ferrarit: Rikthehemi fitues në vitin 2022
Tri garat e para të sezonit rezultuan një dështim total për Ferrarin, me "kokëkuqen" që ka grumbulluar vetëm 27 pikë, duke u renditur në vendin e pestë në klasifikimin e konstruktorëve. E vetmja herë kur Ferrari është ngjitur në podium këtë sezon ka qenë gara e parë në Austri, aty ku Lëklerk u rendit i dyti. Ndonëse pritshmëritë nuk ishin shumë të larta, ky start sezoni ka qenë vërtet katastrofik për skuadrën nga Maranelo. Megjithatë, Xhon Elkan nuk duket shumë i shqetësuar, pasi planet e tij janë afatgjata. Shefi i "Exor"-it, kompanisë që kontrollon edhe Ferrarin, konfirmon besimin për Matia Binoton, ndërsa thekson se misioni i "kokëkuqes" mbetet hapja e një cikli fitues duke nisur që nga viti 2022. "Kemi besim të plotë te Matia Binoto dhe mendojmë se ka karakteristikat e duhura për t'i dhënë jetë një cikli fitues. Ai ka qenë me ne që në kohët e arta të Zhan Todit dhe Majkëll Shumakerit, kështu që e di shumë mirë se çfarë duhet bërë për të pasur sukses. Me Binoton bazat janë të qarta. Jemi të vetëdijshëm për pikat tona të dobëta dhe dëshirojmë që të nisim një cikël të suksesshëm me pilotë të rinj dhe të talentuar", deklaroi Elkan. Më pas pinjolli i familjes Anjeli flet edhe për dyshen e re të pilotëve të Ferrarit, Lëklerk-Sainz: "Po hedhim bazat për të ndërtuar një të ardhme të madhe, e kjo dallohet qartë që te kohëzgjatja e kontratës që kemi firmosur me Sharl Lëklerkun. Ai së bashku me Karlos Sainzin do të marrin shtëpi në Maranelo për të qenë në kontakt të ngushtë me inxhinierët. Kështu që do të japin kontributin e tyre në realizimin e makinës së re". Pandemia e shtyu për në vitin 2022 futjen në fuqi të rregullave teknike, e kjo do të thotë që edhe sezoni i ardhshëm nuk do të ketë shumë ndryshime të mëdha për Ferrarin. Për këtë Elkan u bën apel tifozëve të bëjnë durim: "Tifozët vuajnë ashtu si ne, por vazhdojnë të na mbështesin. Kemi rrugë të gjatë përpara. Por dua të kujtoj se kur nisi epoka e Shumakerit, vinim nga një periudhë e gjatë pa fitore", përfundoi Elkan.