Hija e Mesit në “Duomo”, tjetër sinjal nga Interi
TV i “Suning” prezantoi çuditshëm duelin me Napolin
Inter-Mesi, indicia e dytë? Duket pikërisht kështu nëse sheh atë që ofroi reklama e çuditshme e “PPTV”, televizioni “online” kinez, në pronësi të grupit “Suning”, që financon klubin zikaltër. Ky rrjet habiti dhe ushqeu edhe më shumë shpresat e tifozëve të Interit, teksa dueli i djeshëm me Napolin, një natë përpara zhvillimit u prezantua me një logo të veçantë të ekspozuar në “Duomo”. Në një projektor spikaste hija gjigante e Lionel Mesit (të paktën me atë ngjason), me festimin karakteristik të “Pleshtit”, me duart e drejtuara nga qielli, që projektohej në fasadën e katedrales milaneze. Por se cila është domethënia e kësaj gjetjeje nga televizioni i “Suning” nuk kuptohet...
SHTËPIA NË MILANO
Numri 10 i Barcelonës dihet botërisht se është një ëndërr e madhe e Interit, aq më shumë pasi Juventusi bëri të vetin rivalin e tij të përjetshëm në Spanjë, Kristiano Ronaldon. Por lajmi se babai i tij, Horge Mesi, kishte blerë një shtëpi në qendër të Milanos, fare pranë për më shumë me selinë zikaltër, ndezi të gjitha qelizat e ultrasve të Interit mbi një tratativë të mundshme mes palëve. Pastaj, çështjet e shumta gjyqësore me fiskun spanjoll, pak a shumë si Ronaldo, ishin një shkëndijë tjetër që shtoi edhe më tepër shpresat.
PËRGËNJESHTRIMET
Ndoshta, gjetja e televizionit të “Suning” në prag të InterNapoli, mund të kishte qenë një promocion vetëm për publikun kinez, pasi faktet thonë se si nga Barcelona, ashtu sikurse nga Interi kanë ardhur përgënjeshtrime kategorike në lidhje me një transferim të Lionel Mesit në Milano. “Leo tek Interi është fantashkencë”, deklaronte pak ditë më parë Marota. Ndërsa Bartomeu garantonte: “Premtoj se Mesi do e mbyllë këtu karrierën”. Por ndoshta këto fraza mund të bëjnë punë në Milano dhe në Katalunjë, por jo në Kinë, ku me sa duket futbolli konsiderohet ende një lojë ku të ëndërrosh, nuk të kushton asnjë qindarkë...