Pikë, renditja dhe dy lojtarë, Pioli të përfundojë veprën
Nuk ka vend për lojëra fjalësh, në këtë fundsezoni steka është ngjitur ndjeshëm te Milani e po ashtu pritshmëritë e drejtuesve dhe të tifozërisë. Misionet kryesore i takojnë Stefano Piolit, dhe jo vetëm sepse klubi e konfirmoi duke i larguar një herë e mirë hijen e Rangnikut. Pas ndalesës për shkak të pandemisë, trajneri u duk sikur u shfaq me shkop magjik duke i dhënë ekipit një ritëm titulli. 27 gola në 10 ndeshje dhe 24 pikë pa njohur humbje janë treguesit e forcës kuqezi, teksa fitoret ndaj Juves, Lacios e Romës konfirmuan mundësitë e një ekipi të etiketuar si pa lojë e pa karakter.
– Siç thamë, “shkopi magjik” i Piolit preku anën teknike, por edhe rezultatet sportive teksa benefitet i kishin ndier me kohë disa lojtarë, mes të cilëve më i spikatur është Ante Rebiç. Shpërthimi i kroatit nuk ishte “magjia” e vetme, pasi trajneri diti të rigjallërojë njerëz si Çalhanoglu, Bonaventura dhe Kesi duke arritur deri aty sa t’u dhuronte fanella titullari të harruarve si Bilia apo Laksalt. Falë 54-vjeçarit çelën edhe Gabia me Selemekers, ndërkohë i vetmi që nuk ka pasur ende shansin ka qenë Duarte. Te braziliani kanë ndikuar dy dëmtime të rënda të njëpasnjëshme, por me Piolin, mundësia u vjen të gjithëve. Këtë duhet ta dinë mirë Paketa dhe Leao për të cilët klubi ka paguar plot 62.4 milionë euro. Braziliani ka luajtur 1188 minuta, por pa gjetur rrugën e golit, të cilën kolegu 21-vjeçar e ka gjetur pesë herë në sezon. Shifra shumë të ulëta për dy talente potenciale, nga të cilët Pioli duhet të marrë më tepër, si për rezultat e ekipit, por edhe për ato që lidhen me shitjen e mundshme të ndonjërit prej tyre.
REKORD PIKËSH DHE VEND i 5-të
— Kalendari kuqezi parashikon edhe dy sfida dhe matematika lejon ambicien për të synuar vendin e pestë. Rival i “Djallit” është Roma e cila duhet t’i fitojë patjetër një nga ndeshjet e radhës (Torino dhe Juventus). Në rast se verdhekuqtë nuk fitojnë më dhe Milani rikuperon katër pikët diferencë, atëherë edhe me pikë të barabarta, kuqezinjtë do të renditeshin të pestët për efekt të përballjeve direkte. Përveç klasifikimit, ekipi i Piolit kërkon pikë edhe për rekordin personal. Duke fituar me Sampdorian dhe Kaljarin, “Djalli” do të arrinte kuotën e 66 pikëve, çka do të ishte sasia më e madhe e grumbulluar nga Milani që në sezonin 2012-2013.