Dueli për “Topin e Artë”, ja pse Levës i duhet Champions-i
Polaku duhet të mposhtë "përbindëshin" Ronaldo
Ceremonia për "Topin eArtë 2020" nuk do të zhvillohet për shkak të pandemisë. Ky ka qenë vendimi i "Franc Football" pak javë më parë. Favoriti kryesor sipas bastexhinjve dhe shumicës së njerëzve ishte Robert Levandovski i Bajernit të Mynihut. Me 52 gola të shënuar në të gjitha kompeticionet, ai shihej si lojtari që mund të fitonte "Topin e Artë". Ndërkohë që polaku ka ende mundësi për të lënë gjurmë me golat e tij në Champions, kompeticion ky që nis në muajin gusht. Karl Hainc Rumenige kritikoi ashpër anulimin e eventit duke e quajtur atë të padrejtë. "Robert ka bërë një sezon të madh, ndoshta më të mirin në karrierën e tij. Do të ishte më se e merituar nëse ai do të fitonte çmimin në fjalë. Ndoshta duhet të flasim edhe njëherë tjetër me FIFAan. Më vonë do të flas edhe me Xhani Infantinon, presidentin e (FIFA-as) për të gjetur një mënyrë që ky titull të jepet edhe pse situata nuk është e përshtatshme", tha Rumenige për faqen zyrtare të klubit bavarez ditën e hënë. Edhe pse për të dorëzuar këtë çmim duhet të pritet se kush do të fitojë Champions-in. A është Levandovski me të vërtetë më i mirë se Ronaldo? Portugezi fitoi titullin e dytë radhazi në Torino me Juventusin edhe pse në moshën 35-vjeçare. Në ndeshjen e fundit ndaj Sampdorias, ai shënoi golin e parë në fitoren 2-0 të bardhezinjve. Me 31 gola ai është pas Çiro Imobiles në listën e golashënuesve. Por edhe me dy ndeshje për t'u luajtur, Ronaldo mund të barazonte ose kalonte italianin që është në kuotën e 34 golave (sa Leva). Edhe pse kjo duket e pamundur, por jo për një si Ronaldo. Për portugezin ky ishte kampionati i shtatë që fiton (Junajtid, Real, Juve). Në Champions, CR7 dominon frikshëm përpara polakut. Pesë herë e ka fituar ai trofeun. Në listën e golashënuesve më të mirë në histori ai kryeson tabelën me
128 gola duke lënë pas Lionel Mesin me 114 dhe Raul me 71. Levandovski në krahun tjetër po pret ende Champions-in e tij të parë. Në sezonin aktual ai është golashënuesi më i mirë me 11 gola. Ronaldo ka shënuar vetëm 2. Në sezonin e fundit, Bajerni nuk ia ka dalë të kualifikohet duke shkuar deri në gjysmëfinale ku është eliminuar pikërisht nga Reali. Vetëm
në sezonin e kaluar bavarezët u mundën në çerekfinale nga kampionët në fuqi, Liverpuli. Sfida mes tyre do të nisë vetëm tani, në muajin gusht. Ronaldo dhe Juventus do të luajnë ndeshjen e kthimit ndaj Lionit, duke kërkuar të përmbysin humbjen 1-0 në Francë. Ndërsa Levandovski dhe Bajern kanë një ndeshje më të lehtë me Çelsin. Takimi i parë në Londër
përfundoi 3-0 për kampionët e Gjermanisë. Ecuria pas këtyre ndeshjeve do të jetë përcaktuese për lojtarin më të mirë, edhe nëse ceremonia nuk do të zhvillohet. Ndërkohë gjermani i vetëm që ka fituar "Topin e Artë" pa fituar një Champions në karrierë është Lotar Mateus. Ai ishte 29 vjeç kur mori këtë çmim prestigjioz dhe luante me gjigantët italianë të Interit.