Alarm te Reali, Mariano Diaz del me Koronavirus

Nuk do të luajë ndaj Sitit, por ndeshja nuk rrezikohet

Mariano Diaz është i vetmi lojtar nga Reali i Madridit që ka rezultuar pozitiv me Koronavirus dhe është izoluar në shtëpinë e tij për të qëndruar në karantinë derisa dy testet e tjera që do të bëjë në ditët e ardhshme të dalin negative. Vetëm në këtë mënyrë ai do të ketë eliminuar të gjitha dyshimet dhe rrezikun për të infektuar shokët e skuadrës. Në këtë mënyrë, sulmuesi i Realit të Madridit do të humbasë me siguri ndeshjen e kthimit në Ligën e Kampioneve kundër Mançester Sitit, e cila do të luhet më 7 gusht. Të gjithë lojtarët e Realit patën 1 javë pushime pas fitores së titullit kampion në Spanjë dhe u rikthyen në "Valdebebas" pasi bënë testet për Koronavirusin. Në këtë mënyrë do të siguroheshin për vete dhe për shokët e skuadrës. Testin e kryen edhe stafi teknik, ekipi mjekësor dhe pjesëtarët e zyrës për shtyp. Gjatë javës së pushimit lojtarët kanë qenë të kujdesshëm dhe nën vëzhgimin e stafit mjekësor, por sigurisht që "COVID19" është i pabesë dhe nuk bën dallime. Reali u tregua i kujdesshëm në mënyrë që "COVID-19" të mos përhapej në mënyrë masive në skuadër dhe lojtarët i bënë testet në banesat e tyre. Historia që ndodhi në ditët e fundit me Fuenlabradën ka përhapur panik në Spanjë. Mariano Diaz reagoi përmes rrjeteve sociale në mënyrë që të qetësonte tifozët

e Realit dhe ndjekësit e tij. "Përshëndetje të gjithëve. Dua t'ju falënderoj të gjithëve për mesazhet që më keni sjellë gjatë kësaj kohe. Unë ndihem shumë mirë. Edhe familja ime është mirë. Tani jam i izoluar dhe shpresoj që të rikthehem sa më shpejt në normalitet dhe

të ndihmoj shokët e skuadrës. Një përshëndetje të gjithëve", ka thënë Mariano Diaz.

NDESHJA DO TË LUHET - Pavarësisht se në Angli ky lajm është raportuar me panik dhe me frikën që mbart virusi, ndeshja mes Sitit dhe Realit të Madridit do të zhvillohet

normalisht dhe nuk ka asnjë rrezik. Lojtarët e tjerë të Realit janë të gjithë të pastër dhe nuk rezultojnë të infektuar me "COVID-19". UEFA është njoftuar për gjithçka ka ndodhur dhe nuk ka asnjë arsye që dueli mes dy skuadrave të mos zhvillohet.