33 lojtarë për titullin, Apolonia në skanerin e shifrave
Kampionët e Kategorisë së Parë kanë zhvilluar një kampionat të mirë, por nuk e kanë pasur të lehtë. Mungesa e lojtarëve të mirëfilltë në pozicione të ndryshme, sidomos në mbrojtje, mungesa e përvojës dhe një skuadër që shpesh trysnohej nga ekipe më me eksperiencë - ishin këto disa nga çështjet më thelbësore, që trajneri Mërgjyshi dhe asistentët e tij i menaxhuan në mënyrën më të mirë.
33 LOJTARË - Gjatë kampionatit për Apoloninë u aktivizuan 33 lojtarë. Më shumë ndeshje ka Eljon Sota, me 2250 minuta të plota, ndërsa më pak kanë luajtur 16-vjeçarët Orgest Merkaj dhe Redi Kaçanolli, nga 10 minuta secili. Futbollistët më të vjetër kanë qenë Rudi Nako, 33 vjeç, i larguar te Lushnja në dimër, dhe Taulant Hysenshahaj, 29 vjeç, i larguar në Amerikë. Më të rinjtë janë Orgest Merkaj dhe Redi Kaçanolli, nga 16 vjeç.
GOLAT - Apolonia ishte skuadra më sulmuese e Kategorisë së Parë, me 56 gola të shënuar nga 13 autorë të ndryshëm. Gjata ka 16 gola, Mihana 9, Omeri 5, Mehmeti, Branica, Hysenshahaj dhe Zoga nga 3, Krasniqi, Ejoh, Zaimaj, M.Sota dhe Ymeraj nga 2, Dejan Andoni 1 gol dhe dy autogola në favor të Apolonisë: Sulejmani i Besës dhe Ajazi i Kastriotit. Vetëm në dy takime nuk ka shënuar skuadra fierake, ndaj Shënkollit dhe Orikut në transfertë.
Sa u përket ndëshkimeve, fierakët janë penalizuar me 44 kartonë të verdhë dhe 4 të kuq. Një pikë e dobët eApolonisë ka qenë merkatoja, deri diku e dështuar. Branica, Ceka, Guri, Sharavolli dhe Lushaku nuk dhanë atë që pritej dhe u larguan më parë sesa erdhën, me përjashtim të Sharavollit që ka qenë i dëmtuar. Ymeraj, Kumani, Smaçi, Krasnqi, Zaimaj dhe Ejoh kanë rezultuar goditje të spikatura dhe e kanë ndihmuar skuadrën. Formacioni titullar i Apolonisë mbi bazën e minutave do të përbëhej nga këta futbollistë: Harizaj-1980', Omeri-1349’, Duda-1646’, E.Sota-2250', Ymeraj-1486', Andoni-1255', Zoga-1762', Kumani-1483', Mehmeti-2000', Mihana-1937' dhe Gjata-1575 minuta.